Tura, Oct 22: Sukrobar saloba, Meghalaya a•dokni Chief Minister aro NPP-ni national president Conrad K Sangma, Rajabala constituency-ni Gimegre songona re•ange, NPP-ni candidate Abdus Saleh-na campaign-ko ka•angaha aro ia tom•bimonganio ua jinmana aganprakengon, ia Rajabala bye-election-ara NPP-na namen mongsonggipa election ong•enga aro ia bye-election-o uamang NPP-ni candidate-ko cheatna gita rakbee kamrangko ka•enga ine parakangaha.
Ia tom•bimonganio a•dokni Chief Minister baksana Siju-Rongara-ni MLA Rakkam Sangma, Bajengdoba-ni MLA Pongseng Marak aro Garo Hills-ni dingtang dingtang NPP MDC-rangba dongpae bak ra•angaha.
NPP-ni candidate Abdus Saleh-ko mittelpile aganangengon, ua Mahendraganj constituency-oba changgittamna kingking MLA ong•e Meghalaya sorkarini gitcham minister-ba ong•ani gimin Rajabala bye-election-o seokako man•taigenchimode Rajabala constituency-na bang•a namgnirangko ra•bana man•gen ine NPP-ni national president parakataha.
NPP-ni campaign ka•anirangko nitimna gita ua an•tangan Rajabala constituency-o dongkame kamko ka•enga ine janapatengon, ian NPP-ni ia election-na gisiko nange kam ka•aniko mesokani ong•enga ine Chief Minister parakataha.
Opposition dolrangni tol•e ku•mikchetanirangko bebera•jachina aro October-ni 30 tariko bang•a manderangkon re•bae NPP-na pu•onchina gitaba ua didiangaha.
Ia tom•anio NPP-ni MLA Rakkam Sangma-ba jinmana aganprakangengon, Rajabala constituency-ni ning•o donggipa bang•a A•chikrangba NPP-ni candidate Abdus Saleh-na pu•onne NPP-ko bilakbatatna ine ku•monganiko on•angaha.
NPP dolara A•chikrangni bikotgipa dolan ong•a ine talatangengon, NPP-ni candidate-ko seokgenchimode NPP-ni mikkim rasongko chubatatna dakchakani ong•gen ine Siju-Rongara-ni MLA aganaha.
Ia tom•anio NPP-ni candidate Abdus Saleh-ba Gimegre songni manderangna aganprakengon, ua Rajabala constituency-o pilakni gitan namroro silroroaniko ra•bana kam ka•gen aro ia constituency-ni ning•o donggipa darang jatkoba mikkang niteani gri kam ka•gen ine ku•rachakaniko on•angaha.
