Ampati, Feb 24: Bristibar salo, Meghalaya a•dokni Chief Minister Conrad K Sangma, Rerapara C&RD Block-na pangchakaniko songe on•angaha aro SHG Mela-koba a•bachengate on•angjolaha. Ia tom•anio North Tura-ni MLA Thomas A Sangma, Boldamgre-ni MDC Stevie Marak aro South West Garo Hills a•jani officer-rangba dongpae bak ra•angaha.Ia tom•anio a•dokni Chief Minister Conrad K Sangma, jinmana aganprakangengon, dingtang dingtang program aro scheme-rangko ra•gate a•dok sorkari, me•chikrangna, game ge•e cha•giparangna aro chadamberangna janggi tangani cholrangko on•na kam ka•enga aro iandakgipa program-rangoni mingsara National Rural Livelihood Mission (NRLM)-ni ning•o self help group (SHG)-rangna dakchakaniko on•anian ong•a ine parakangaha. A•dokni dingtang dingtang block-rango bang•bea SHG-rangko bikotaha aro ia SHG-rangna sorkari, Start Up Funds, Revolving Fund, Community Management Fund aro Bank Loan-rangchi tangka paisarangko dakchake on•enga ineba Chief Minister aganaha.

A•dok gimiko lak 4-mang membor donggipa dol 40,000 SHG-rangna sorkari, gong kror 220-mangni gita tangka paisarangko dakchake on•aha ineba ia tom•anio Chief Minister parakataha.

Ia program-ko ong•atanio Rerapara C&RD Block-ni ning•o donggipa dol 12 village organisation (VO)-rangna gong kror 1.30 tangka paisarangko dakchake on•angan baksana Meghalaya Rural Bank-ni sud grigipa gong lak 50-ni loan-koba on•angjolaha.

Ia tom•anio a•dokni Chief Minister, game ge•e cha•enggipa manderangko dakchakna sorkari ra•gatgipa FOCUS program-ni gimin talate on•angaha aro a•dokni dingtang dingtang mission-rang, jekai Piggery Mission, Dairy Mission, Poultry Mission, Aquaculture Mission aro uandakgipa kamrangni giminba talate on•angenba, ia mission-rangni namgniko cooperative society-rang gita ra•china songni manderangko didiangaha.

Rerapara C&RD Block-ni gital building-ko rikna gita gong kror 2 lak 25 tangkarangko sorkari chame on•aha aro kamrangko bakan a•bachenggnok ineba Chief Minister, ia gital building-na pangchakaniko songe on•angani somoio jinmana parakataha. Ia gital building-ko somoi gita matchotatna man•na gita kamrangko name ka•china contractor-ko aro BDO-koba ua didiangaha.

Meghalaya a•dok gimikni dam 46 block-rangon gital building-rangko rikna gita sorkari, gong kror 120-ko chamataha ine talataniko on•angengon, iana tender-ko March-April jani gisepon on•gnok ine ia tom•anio Chief Minister parakataha.

Gital block-rangko aro civil sub-division-rangko bikote on•china dabienggipani bidingo sorkari name nipiltaigen ineba Chief Minister, ku•rachakaniko on•angaha.