Williamnagar, Oct 10: Ri Bhoi a·jani Byrnihat 15th Mile jolo donggipa Rangsakona songni Nokma John R Marak-ko rim·ani ja·man Byrnihat police outpost-o adita so·sojengjeng ong·aniko nikna man·aha.
Rangsakona songni saksa Wilbert Marak-ni Hub News-na u·iatani gitade, British sorkarini somoionin A·chikrang, Ri Bhoi a·jani Rangsakona songo songdong a·chabatokaha indiba ja·mano Khasi jatni Bhoi manderangba, ia songona re·bae, A·chikrang baksa songdongepaaha.
Ua somoirango Bhoi Khasirang, A·chikrang baksa meli-nangrimen ia songo songdong a·chatokaha aro uamang A·chikkoba namen aganna man·tokaha.
Songsul Tamulkuchi aro Borboin jeon Mikir jatni manderang songdong a·chatokachim, uamangba apsan daken A·chikrang baksa meli nangrime maming kajia-golmal grian da·alona kingking ku·mong nangrime dongtokenga indiba da·o Bangladesh a·songni sima joloni War jatni manderang re·baani ja·man, ia jolo songdongenggipa A·chikrang neng·nikanirangko chagrongna nangtokengaha ine Marak aganaha.
“Ia War jatni manderang, A·chikrang baksa meligrikna man·jae, Nongtymai ine bimingko donenba gital songko bikotaha aro uamang Rangsakona songkoba ra·sekna jotton ka·aha indiba Raidmared-ni Raja, jatgnini gisepo kajia-golmal ong·aniko nikna sikjae, uamangni kamko raken jegalaha,” ine Marak aganaha.
Uni ja·manba uamang, A·chik Nokmarangko ra·galna jotton ka·aha aro A·chikrangni kosako sinjetanirangko on·na a·bachengaha ineba Marak parakataha.
“Ia manderang, Rangsakona songona re·bae, job card-ni kam ka·giparangkoba dontongataha indiba songni dilgiparang, Ri Bhoi a·jani deputy commissioner, MLA, MDC aro police-rangna lekkarangko sedoenba, chel·chakaniko on·china didiaha,” ine Marak aganaha.
“Indake ong·genchimoba, September-ni 19 tariko ia manderang, salni somoio re·baenba kam ka·giparangko dongtongattaiaha aro ua somoio uamang Raja aro Block-ni manderangko rimbae, kam ka·giparangko champengeaha aro uamangnade Rangsakona songara Nongtymai songsa ong·aia ine aganaha. Indiba ja·mano Raja aro Block-ni manderang, lekka pancharangko nie, iade Rangsakona songni a·an ong·a ine ma·sie ra·angaha. Indake ong·genchimoba, ia manderang, October-ni 9 tarikoba Rangsakona songona re·bae kam ka·giparangko champengetaiaha. Uamangni iandake changni chang kam ka·giparangko dontongateahani gimin songni manderang, songsul noksulni manderang baksa aro AIGU aro GSU dolni dilgiparangba re·bae golpogrikenba iako namate re·angpiltokaha,” ine Marak aganaha.
Indake ong·engon, October-ni 9 tarik attamchipak, songsul Nongtymai-ni manderang, Byrnihat police outpost-ona re·ange, Rangsakona songni Nokma John R Marak-ko rim·china badi ka·angaha aro ja·mano Nokmako rim·aha ine knaon songni nokni aro songsulni manderangba jinma Byrnihat police outpost-ona re·ange tom·chimongtokaha. Ja·mano AIGU aro GSU-ni dilgiparang, songni nokni manderang baksa Byrnihat outpost-ona re·ange golpogrikani ja·man Rangsakona songni Nokma John R Marak-ko watpilaha ine Marak parakataha.
Na·simang iakoba nina man·gen:
Na·simang iakoba poraina man·gen: Shillong Viewpoint ramako tarie on·china MDC tom·anirangko dakdila
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
