Shillong, Jylliew 11: Ka jingiakynad kaba jur ka la mih ha khappud India bad Bangladesh ha South West Garo Hills district ka Jylla Meghalaya hadien ba ki bor shipai khappud ka Bangladesh ki la kyntait ban pdiang ia uwei u nong Bangladesh uba la shah bat hajan khappud, kaba la pynlong ia utei u briew ban sahkut ha ka no-man’s land bad kane kala pynmih ia ka thma ktien badki shipai BSF ha khappud.
Kane ka jingjia ka la jia ha ka bynta jong ka Nandirchar kaba don hajan ka Mahendraganj, ha kaba la iohi ba ki briew jong ki shipai Border Security Force (BSF) bad ki Border Guard Bangladesh (BGB) la sakhi ba don bynta ha ka thma ktien halor ka jinglong tynrai bad ka jingtrai jong une u briew.Naduh katei ka por ki video jong katei ka thma ktien ki la saphriang bha ha ki social media.
Katkum ki tyllong khubor na ki BSF, la iathuh ba utei u briew uba la tip kyrteng kum u Sati Rajbanshi uba la 55 snem ka rta na ka shnong Chalna kaba don ha Rajshahi district jong ka ri Bangladesh, u la wan rung beain sha u pud u sam jong ka India lyngba ka khappud ka Meghalaya bad hadien kata la kem ia u da ki shipai BSF.
Hynrei la kynnoh ba ki bor ba dei khmih ka Bangladesh ki la kyntait ban pdiang ia u ha ka por ba la ialam biang ia u sha khappud, kaba la pynlong ia u ban sahkut slem bha.
Ki BSF ki la ong ba u Rajbanshi u dei u nongshong shnong ka Bangladesh bad u dang sahkut ha khappud no-man’s land hadien ba la iathuh ba ka commander-level flag hapdeng ki BSF bad ki BGB kam shym la lah ban pynbeit ia kane ka mat.
Kane ka jingjia ka la pynmih ia ki jingkynnoh kiba ia pyrshah na ki arliang mamla.
Katba la iathuh ba ki bor ba dei khmih ka Bangladesh ki la buh jingkylli ia ka jinglong tynrai bad ka jinglong trai ri jong utei u briew, ki tyllong khubor na ki BSF ki la kynnoh ba ki briew jong ka BGB ki la pyrshang hi ban pynrung ia utei u briew sha ka jaka jong ka ri India hadien ba ki la leit rah ia u na ka shnong jong u ha Rajshahi.
“Ka Bangladesh ka pyrshang ban pynjah burom ia ka India.Ki BSF kim shym la phah kylla ia une u briew.Hynrei ki BGB ki la phah ia u sha ki jaka jong ka ri India.Ka paw ba namar ba u dei u Hindu, u shah pynkylla sohpdung ha ki bor ba dei khmih ka Bangladesh,” la kynnoh ka tyllong khubor na ki BSF.
Ki heh ophisar ki la iathuh ba utei u briew u la shah bat hadien ba la kynnoh ba u la iaid lyngba sha u pud u sam jong ka India khlem ki kot ki sla kiba biang. Ki BSF ki la pynskhem ba u dei u nong Bangladesh bad la bud ryntih ia ki rukom treikam kumba la buh.
Kane ka jingjia ka wan hapdeng ka jingpynleit jingmut kaba jur bha halor ka jingwan buhai shnong beaiñ ha shilynter ka khappud India’s eastern frontier. U Myntri Rangbah ka Assam u Himanta Biswa Sarma u la pynpaw bunsien ba ka jylla kan pynjur ïa ki lad jingïada pyrshah ïa ki nongwan buhai shnong na Bangladesh ki bym don kot don sla ha u snem 2026, ha kaba ki bor synshar ki dang ïai bteng ïa ka jingpyrshang ban lap bad beh noh ïa ki bar jylla kiba sah be-aiñ.
Ki tyllong khubor na ki BSF ki ïathuh ba kum kane ka jingïakajia halor ka jinglong trai ri bad ka jingshah pynphai kylla la sakhi ha kiwei pat ki bynta ha shilynter ka khappud India bad Bangladesh, kynthup ïa ki bynta jong ka West Bengal.
Da ka jingïakren kaba dang lah ban ai jingmyntoi, une u briew u dang ïai bteng ban sahkut ha ka jaka no-man’s land, kaba pynpaw ïa ki jingeh kiba don sawdong jong ka jingwan buhai shnong shabar u pud, ki jingïakynad halor ka jinglong nongshong shnong bad ka jingpynïaid khappud hapdeng ki arliang mamla.
Pule ruh : Pynsangeh ka Sorkar ia ka jingleit bar ri ki Myntri, MLA bad Ophisar haduh 6 bnai
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
