Shillong, Feb 12: Meghalaya-o sajinmana tikako su·atenggipao mijal Bristibar salona tikako su·anganio gimik sak 2,806 mangni gita sabisiko an·pachake sangiparangni tikako maming jechakani grian su·angtokanichi a·dok gimikoni West Garo Hills a·jao chu·sokbataniko nikna man·angaha jeon district-ni chu·gimik percentage-ara 58.08 gapeaha. Indake ong·genchimoba, tika su·na bimingrangko on·soa gimikan sak 1417-mangsan ong·aianio mijalona sak 949-mang tikako su·angoba South West Garo Hills a·jaan chu·gimik percentage-ode 71.3 ong·angskaaha.
Tikako su·na gita sabisiko an·pachake sangiparangni bimingrangko on·sogimin sak 17,585-mangoni mijal Bristibar salona kingkingde sak 11,450 mangni gitasa tikako su·angtokkuenga. Indake, da·o Meghalaya a·dok gimiko sajinmana tikako su·atanio chu·soka gimikara 34.50 percent ong·engkua, ine Director of Health Services (MI) Dr. Aman War u·iataha.
East Khasi Hills a·jao sak 2,694-mang tikako su·angaha, South West Khasi Hills-o sak 276-mang aro Ri Bhoi-o sak 362-mangni gita tikako su·angtokaha. Indake ong·oba, Ri Bhoi district-o tikako su·na jechakanide dongkuaiaha, jeon 15.9 mangni gitasan chu·sokaniko knasona gita man·aha.
Sabisiko chelchakna gita tikako su·atani da·o gittamgipa antiko ga·dapoba, Meghalaya a·dokoni saako sangiparang da·omangba tikako su·na an·tangtangko an·chake on·na sikgijagiparang dongkuaiaha, indake tikako su·na man·giparang gimik sak 33,000 mangna batgipaoni da·alona 34.50 percent-mangni gitasan sajinmani tikako su·tokkuaienga ine a·gipi official Bristibar salo parakataha.
Indake ong·engon, mijal Bristibar salona sajinmani gital mamlao sak 7 manderangko segatangtaia baksa sak 5 manderang ia sabisioni nampilgipaba dongaha.
Iani bidingo, Director of Health Services (MI) Dr Aman War-ni u·iatani gita, gital sanaptaigipa sak 7 manderangko East Khasi Hills district-oniko man·aha. Saaoni nampilgiparangara East Khasi Hills district-oni sakgni, West Jaintia Hills district-oni saksa, West Khasi Hills district-oni saksa aro Ri Bhoi district-oni saksa.
Da·alona, Meghalaya a·dok gimiko coronavirus saa man·gipa sak 13,931-mang gapaha jeoni sak 166 mang saaoni nampiltokkuja, sak 13,617 mang nampiltokaha aro sak 148 mang ia sabisiko man·e siangaha.
Saaoni nampilkugijagiparangara East Khasi Hills-oni sak 109, West Jaintia Hills-oni sak 29,
Ri Bhoi-oni sak 22, East Jaintia Hills-oni sak 3, West Khasi Hills-oni sak 2 aro West Garo Hills-oni saksa.
