Tura, Feb 12: Williamnagar-o Greenyard Higher Secondary School-ni gital nokko da·al Sukrobar salni bako, Meghalaya sorkarini Chief Whip aro Williamnagar-ni MLA Marcuise N Marak-ni jakchi nokdonggae on·angaha aro ia skul nokko nokdonggaani somoio East Garo Hills a·jani Deputy Commissioner Swapnil Tembe aro a·jani gipin officer-rangba dongpae bak ra·angaha.
Ia skul nokko rikna gita ‘Supporting Human Capital Development Project’-ni ning·o Asian Development Bank (ADB), tangka paisarangko dakchake on·aha.
Ia skul nokko nokdonggae on·angani somoio Williamnagar-ni MLA jinmana aganprakangengon, East Garo Hills a·jao lekka porako on·na gita bang·en on·gilahani gimin Greenyard skulko mittelpilangaha.
Bida budiko on·chakenggipa skul nokrangko namdapatna nangengani gimin aro East Garo Hills a·jani chatro chatrirangna nambata lekka poraniko on·na nangengani gimin aganangengon, MPSC-ni mongsonggipa porikkao chu·sokna man·gipa a·jani chadambe sakgniko toe aganangenba, iandakgipa susaani porikkarango bak ra·china a·jani chadamberangko didirongengani gimin East Garo Hills a·jani Deputy Commissioner Swapnil Tembe-ko mittelpilangaha aro mikkangchiba iandake a·jani chadamberangna agan-ku·pattianirangko on·angkuchina uko didiangaha.
East Garo Hills a·jani chatro chatrirangba mikkangchi dingtang dingtang kamrango chu·sokanggiparang ong·na man·na gita skigiparangko aro ma·a paarangkoba gisiko nange kam ka·china Marak didiangaha.
UPSC porikkarangkoba sechina gita a·jani chatro chatrirangko didiangengon, Rongrenggre Govt Higher Secondary School-naba ua ta·raken gital skul nokko rike on·na man·na gita krenge kamko ka·enga ine Marak parakangaha.
Ia skul nokko nokdonggae on·angani somoio East Garo Hills a·jani Deputy Commissioner Swapnil Tembe-ba jinmana aganprakengon, ia gital skul nokko man·ahani gimin Greenyard skulna an·tangni kusi ong·chakaniko parakangenba, lekka porani a·bao East Garo Hills a·jaba a·dokni gipin a·jarango gitan skul no karo gipin kolrangko namdapatna ja·ku de·enga ine parakangaha.
Ia gital skul nokko nokdonggae on·angani somoio dongpae jinmana aganprakanggipa gipin manderangara, GHADC-ni gitcham chairman Denang T Sangma, skulni principal aro Williamnagar-ni gitcham ADC PR Mara karo gipinrang ong·a.
