Tura, Nov 27: Serampore College (University)-ni Convocation-ko Sonibar salo, Tura-ni Edenbari jolo donggipa Harding Theological College-o sokachakaha aro ia convocation-ko ong·atanio, Doctor of Theology (D.Th.), Doctor of Ministry (D.Min), Master of Theology (M.Th,), Master of Christian Studies (MCS), Bachelor of Divinity (B.D.), Bachelor of Christian Studies (BCS) aro Bachelor of Theology degree-rangko Serampore College Council-ni Master, Bishop Dr Anilkumar John Servand, suale on·angaha.
Serampore College-ko William Carey a·bachengate on·angahachim aro ia college-o Theology-ko poraigipa chatro chatrirangna, dingtang dingtang degree-rangko British-rangni somoionin sorkari bilko on·ahachim.
Ia Serampore College (University) Senate-ni ning·o dam 65 theological college ba seminary-rang bak ong·enga aro ia Convocation-ko ong·ataniona ia pilak college-ni principal-rang, poraia matchotgimin chatro chatrirang aro council-ni dilgiparang gimik sak 600 batpile sokbatokaha.
Ia Convocation-o A·chikrangoniba Rev Alpha Sengba D Marak, Doctor of Ministry degree-ko ra·chakpaaha aro unbaksana adita sak chatro chatrirang, M.Th, B.D. aro BCS degree-rangkoba man·aha.
