26.3 C
Tura
spot_img

Sima-ariko chelchakna sima-arina kajinako ra·china Syiem, sorkarina agan-ku·pattia

Must read

Shillong, Nov 18: Songsalna aro jatna kam ka·anio saksa niksenggipa Michael Syiem, a·dokni sima-arirangko chelchakna nangdapenggipa police battalion-rangko bariatanio sorkarina tangka-paisarangchi dakchakna sima-arina kajinarangko ra·na nangani gimin agan-ku·pattianiko on·angaha.

Sima-ariko badee Assam-chini napdrabaanirang ong·a changantin, NGO-rang aro dingtang dingtang political dolrangba iako pangkame tik dake on·aniko nangnike suk ong·gijanirangko janaprongbaoba, Meghalaya-o ja·rikenggipa cadre system namjanichi aro chu·onga gita police-rang donggijanichi an·chingni gamchatbegipa a·arangko gimaroroatangna nangenga ine mija Mongolbar salo koborna seachi u·iatanggipao Syiem janapaha.

“Gipin salgro-salaram a·dokrango ja·rikbaenga gita, nangrimatenggipa IAS, IPS cadre-ko bak dakani gimin ma·mong sorkariming agangrika baksana, minggipin bilchi-jakchi dakna man·gnigipa cholara sima-ariko dingtangmancha chelchakna gita nangdapgipa police battalion-rangko bariatanina sima-arina kajinarangko ra·skaeming a·dok sorkarina tangka-paisarangchi dakchakaniko on·angna man·gen,” ine ua aganaha.

Shillong, Tura aro Jowai-o nok nokgiparangoniko komibegipa gong 100 ka·e, para donggiparangoniko gong 50 ka·e jaanti kajinako ra·eming, gipin district-ni skotongrangoniko aro songadamrango nokprakniko on·tisa komikale kajinako ra·skaming, private-o chalaigipa skichakram biaprang aro karkanarangoniko bang·bata kajinarangko ra·anirang baksa nangenggipa sipairangko bariatanina chu·onga gitan tangka-paisarangchi sorkarina dakchakna man·gen ineba ua agan-ku·pattiaha.

“Iarangde angni agan-ku·pattianisan ong·a indiba, kajinako ong·katatani minggipin cholrangoniko sorkarian chimongna man·aigen ine anga ka·donga,” ua agandapaha.
Uni aganani gitade, a·dokko man·chengaonin sima-ariko tik ong·e bak ka·anirang dongjahani gimino, Meghalaya-ko bakgipa songsul Assam a·dok baksa bang·en neng·nikanirangko chagrongrongenga. Gitchambatgipa a·dok ong·a baksana police-rang aro nangrimatenggipa cadre-rang donganichi uamang dal·batani gadangko man·enga, indaken uamang changni-chang napdrabaanirangchi sima-ario Meghalaya-ko kal·ake roani bewalrang donga, ineba Syiem janapataha.

spot_img

More articles

spot_img
-->

Latest article