Shillong, April 24: India a·songo songdonggipa bang·a jatrangni an·tangtangni tarigimin niamrang gita chasongrangna ja·rikbaenganichi dingtanggrikaniko bon·atna aro songdonggipa pilaknan apsanko on·na miksonge, ma·mong sorkarini India -o ra·gatnasienggipa Uniform Civil Code (UCC)-ko nangrime jegalsoaniko dakani gita Meghalaya-ni ge·gittam Autonomous District Council (ADC)-rang Sombar salo chanchirimangangenba resolution-ko ra·gatna tik ka·angaha.
Iani bidingo, a·dokni ge·gittam ADC-rang jekai Khasi Hills Autonomous District Council (KHADC), Jaintia Hills Autonomous District Council (JHADC) aro Garo Hills Autonomous District Council (GHADC)-ni Chief Executive Member (CEM)-rang, Sombar salo a·dokni skotong Shillong-o apsan tom·angenba tik ka·aniko dakangaha.
“Sixth Schedule-ni a·jarango UCC-ko ma·mong sorkarini ra·gatnasienganiko chu·gimik jegalsona gita chinga apsan tik ka·aha aro iani bidingo council-tangtango tom·taienba ru·utgijan resolution-koba ra·gatanggen,” ine KHADC-ni CEM Pa Titosstarwell Chyne, tom·ani ja·man kobor ra·timgiparangna parakataha.
A·song gimiko UCC Bill-ko ma·mong sorkarini ra·gatna miksongengani gimin tom·anio chinga ning·tue chanchirimaha ine agananengon, ia UCC Bill-chi ADC-rangni sason ka·ani ba chalaiani bilrangko ol·grokatgen, mongsongbate chingni jatni daka-rikanirango aro chasongrangna ja·rikbaenggipa dakbewalrango aro jatgimikna neng·nikanirangko ra·bachongmotgen ineba ua aganangkuaha.
Ia mamlani bidingo mikkang jarangon special session-ko ong·atna gita chinga ka·dongsoenga, maina ian nangchongmotgipa ong·a aro iako chinga ta·raken chanchina gita nangnikenga ineba Pa Chyne, kobor ra·timgiparangni sing·anina aganchakangaha.
Ia Bill-ko jegalsoengani gimin talatangengon, aganbagimin gita ia niamchi chingni jatni daka-rikanirango jekai, bia ka·anio bang·a neng·nikanirangko ra·bachongmotgen ine aganange, UCC-ko jensomoio ra·gatahaon, bia ka·ani bewalrang apsan ong·na nanggnok, aro chingni dakbewalrangara namen dingtangskaani gimin torom aro jatni daka-rikanirango ia niamchi namen nangchakeaniko man·gen ine janapatkuan baksa, Scheduled Tribe a·ja ong·ani gimin a·doko UCC-ko ra·gatna man·chongmotjawaniko chinga nikatenga ineba KHADC-ni CEM parakataha.
Batanggimin somoio, Citizenship Amendment Act-ko Sixth Scheduled a·jao ra·gatgniko watchanganga gita apsandaken, UCC-ko a·doko ra·gatgnigipakoba watchangna nanga ine anga chanchia aro a·dokni ge·gittam ADC-rango iana skang chanchirime jinma tik ka·anganiko ra·chakanga gitan apsan, a·dok sorkariba namnikpana gita nanggen ineba Pa Chyne agandapataha.
