Tura, Jan 4: District Administration-ni sajinmana dongimin niamrang donggenchim ong•oba Garo Hills gimikon Krismas aro Bilsi Gital-ko tom•tome maniangaha.
Ia dal•begipa kusini salrango Garo Hills-ni bang•a songrangon Krismas aro Bilsi Gital-ko nambee aro kusi ong•bee jinma chrok mesae aro cha•e ringe maniangtokaha.
Ia 2021 bilsi gital-ko January-ni 1 aro 2 tarikrango GH-ni dingtang dingtang biaprangon jinma kusi ong•bee maniangtokaha. Una agreba bilsianti ong•atronga gita Songkristan Chroksusaanirangko dingtang dingtang songrangon ong•atangaha. Iandakgipa kusini salo North Garo Hills-ni bang•a dingtang dingtang songrango Songkristan Chroksusaanirangko ong•atna gita tarisoahachim indiba giproroenggipa sabisiko champengsona gita NGH District administration, Songkristan Chroksusaanirangko champengatskaha uni a•selo NGH-o Songkristan Chroksusaaniko ine ong•atna man•jaha ine koborko man•soaha.
Ia 2021 bilsi gital-ko bang•a manderangan kusi ong•bee rimchaksoan baksa ia bilsi gitalni January 5 aro 6 tarikrangona kingking Songkristan Chroksusaanirangko ong•atangkunaba donga ine koborko man•soaha.
Da•ororo a•gilsak gimikon kenbegnigipa sabisi giproroengahani gimin, ua sabisiko champengsona gita sorkari rakgipa niamrangko donahachim indiba bang•bata songrangon Krismas aro Bilsi Gital salrango manderang jinma tom•dake chrok mesaanirangko dake sorkarini sajinmana dongimin niamko pe•skaha.
