Tura, Jan 22: Tura-o Department of Information & Public Relations (DIPR)-ni Fixed Audio System (FAS)-ko da•al Sukrobar salo, a•dokni Information & Public Relations (I&PR) Minister James K Sangma-ni jakchi a•bachengate on•angaha aro ia audio system-ko a•bachengate on•angani somoio West Garo Hills a•jani Deputy Commissioner Ram Singh, Information & Public Relations-ni Director BS Sohliya, I&PR-ni Assistant Director FK Marak aro department-ni gipin officer-rangba dongpae bak ra•angaha.
Ia FAS-ko a•bachengate on•angani somoio a•dokni I&PR Minister jinmana aganprakengon, sabisirangni giproroaniara somoi gita koborrangko on•ani gamchataniko mandena skie on•angaha aro ia Fixed Audio System-ara sorkarini ge•etanirang, niamrang, sorkarini ka•sae on•anirang, tika su•anirang, sanna banani program-rang aro gipin scheme-rangni bidingo manderangna somoi gita u•iatanirangko on•anio dakchakani ong•gen ine parakangaha.
Ia project-ko ra•gatanichi Tura-ni wilwilao songdongenggipa manderangna ta•raken koborrangko sokatna dakchakani ong•gnok ineba ua ia project-ko jako ra•ahani gimin DIPR-ko mittelpilangaha.
Sabisini giproroaniko champengna gita re•anggipa bilsio lockdown-rangko ra•gatani somoio bang•en social media-rango tol•e jangbingbangatanirangchi manderangna ma•sisretanirangko aro kenjagokanirangko on•angaha ineba Sangma parakataha.
Ia kamna tangka paisarangko chame on•ahani gimin Meghalaya a•dokni Chief Minister Conrad K Sangma-ko mittelpilangengon, Chief Minister-ni ra•chakani ja•manosa ia Fixed Audio System-ko ra•gatna gita DIPR ja•kurangko de•na man•aha ine I&PR Minister parakataha.
Ia tom•anio DIPR-ni Assistant Director FK Marak-ba mittelpilani kattarangko aganangengon, batanggimin bilsi 25-ni gisepo darang minister-rangan Tura-ni DIPR office-ona re•anga dongkujachim ine James Sangma-ko mittelpilangenba, ia gital kolko a•bachengatanichi ia department, skangona bate manderang baksa nangrimbate kamko ka•na man•gnok ine an•tangni ka•dongchakenganiko parakangaha.
