Tura, Apr 15: Meghalaya a•doko darangkoba watchanggija pilaknan lekka porako on•na kam ka•ani bak gita Budbar salo, District level ULLAS (Understanding of Lifelong Learning for All in Society (ULLAS) Festival 2026-ko Tura-ni Dakopgre-o donggipa SMELC building-o ong•atangaha.
Ia program-ko adita salrangna skang Shillong-o a•bachengatani ja•man State Literacy Mission Authority (SLMA), School Education & Literacy-ni Joint Director baksa nangrime Tura-oba ong•ataha.
Ia program-ko ong•atanio, a•dokni Cabinet Minister Marcuise N Marak, mongsonggipa sokgipa ong•e bak ra•angaha aro unbaksana West Garo Hills a•jani Deputy Commissioner Vibhor Aggarwal, School Education & Literacy-ni Director Banteilang J Kharshandi aro dingtang dingtang official-rangba bak ra•angaha.
Ia ULLAS program-ko 2022 bilsioni 2027 bilsiona, skulrango poraipana chol man•gijagipa ja•delgimin manderangna lekka porako on•na gita ong•atenga aro ia program-ni ning•o manderang, nambate poraina man•na gita ki•taprangkoba Garo, Khasi aro Jaintia ku•sikrangchi tariaha.
Ia program-ko ong•atanio Cabinet Minister Marcuise N Marak, tom•anio bak ra•giparangna aganprakangengon, ia ULLAS program-ara, skie ra•aniko janggi tanga gimik dakani ine gisik ra•atani ong•a aro ia program-ara, a•bachengo lekka porako man•pagijagipa bilsi 15 batgimin manderangna lekka porako ra•na gnigipa cholko on•ani ong•a ine parakatenba, iandakgipa cholrangko ra•china manderangko didiangaha.
Meghalaya a•doko lekka porako tang•doatna miksonganio a•dok sorkari, ia bilsini budget-o gong crore 3347-ko Education department-na chamaha ineba Marak parakataha.
Da•o dipet a•doko lekka pora man•ani percentage 94.2 percent ong•enga ine janapatengon, lekka pora man•ani percentage-ko 95 percent gapatahaode, Chief Minister Conrad K Sangma-ni dilanichi 2030 bilsini gisepo Meghalaya a•dokko chu•gimik literate state ba lekka pora man•gipa a•dok ong•atna miksonganiko chu•sokgipa ong•atna man•gnok ine Marak aganaha.
Na·simang iakoba nina man·gen:
Na·simang iakoba poraina man·gen: Arunachal-o Int’l Maha Sangken Festival-ko mania
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
