Shillong, Oct 20: Upper Shillong-o National Highways & Infrastructure Development Corporation Limited (NHIDCL)-ni apalbatate tarienggipa National Highway (NH-40) ramani mitam bakrangara chengonin Kurkalang (Kseh) ma•chongnisa ong•achim ine a•kange rama tarianiko champengatengani a•sel da•o ia ramako tarianio gital dake neng•nikaniko chagrongna nangtaiengaha.

Ia Kurkalang ma•chongni secretary Egenstar Kurkalang-ni parakatani gitade, Upper Shillong-o tarienggipa ramana sorkari, tangka paisarangko game on•jaskalde uamang ia ramako tarina on•gija jingjengatanggen.Ia ramako tarina skangan uamang changni chang sorkarina sedoatahachim indiba sorkari uamangni dabianirangko knachakgija ia ramako tarina a•bachengataha ine Kurkalang ma•chongni sakgipin dilgipa Joken Kurkalang parakatskaaha.Meghalaya aro Bangladesh a•songko nangdimeatgipa aro Shillong-oni Tamabil-ona dakanggipa NH-40 ramako apalbatatna gita sorkari, NHIDCL-na pakwate on•ahachim aro ia ramako tarina gita Japanese International Cooperaton Agency (JICA), gong kror 1,251 tangkarangko dakchake on•engachim. Ia ramako 2023 bilsini December jao matchotatna somoiko donsoengachim.