Tura, Dec 15 :West Garo Hills a•jao bol wa•arangko skatang den•e galanirangko komiatna, a•sal grigipa aro bol wa•a grigipa biaprango bol wa•arangko gapatna aro chiring chibisikrangko tange rakkina gita REDD plus Project-ko Garo Hills-o a•bachengatna December 15 tariko DRDA conference Hall-o tom•angaha.
Tom•anio dingtang dingtang department-rangni official-rang chanchirimangaha jekon Khasi Hills Community REDD plus aro West Garo Hills, District Administration baksa nangrime ong•atangaha jeonan dingtang dingtang department-ni official-rang, NGO-rang aro Nokmarangko re•bae bakko ra•echina West Garo Hills-ni Deputy Commissioner okamataha.
Ia REDD plus ba Reducing Emission from Deforestation and Forest Degradation-ko India gimikoni East Khasi Hills district-an skanggipa changna ong•atchengaha aro Watershed Conservation Project-ko 2005 bilsionin Community Forestry International-ni nirokanichi ong•atchengaha. REDD plus-ara cham•gimin ba gimaatgimin buring bolgrimrangko tange ripingna aro uarangko tangchaatpilanian ong•a.
Buring bolgrimrangko wa•al kamaniko gimaatna ba bon•atna gitade songni nokni manderang, sorkarini Department-rang baksa jak on•paanichisa bon•atna man•gen, aro wal•ku bang•e ong•katgipa am•bolrangko jakkalgija wal•ku ong•kata komigipakosa jakkalna nanga.
Tree Adoption Program ba dingtang dingtang bol wa•arangko ripingna program-rangko ong•atrongna nanga aro ia program-rango manderang bakko ra•na nanga ine Khasi Hills, Community REDD plus Project-ni Secretary Pa Tambor Lyngdoh aganangaha.
