Williamnagar, Nov 21: Williamnagar-o gital rikgipa be•en aro na•tok palchakgipa nok baksana Williamnagar Municipal Board (WMB)-ni extension office building-ko Sukrobar salo, Meghalaya a•dokni Soil & Water Conservation Minister Marcuise N Marak, East Garo Hills a•jani Deputy Commissioner RP Marak, Superintendent of Police (SP) Stephen Rynjah, Regional Planning & Development Council Tura-ni Deputy Chairman Sengbath R Marak, Additional Deputy Commissioner-rang, Assistant Commissioners, Block Development Officer-rang aro dingtang dingtang official-rangni mikkango nokdonggae on•angaha.
Ia nokko rike on•anichi Williamnagar jillao be•en aro na•tok palgiparang, an•tangtangni bosturangko rongtalbate aro nambate palna sim•na cholko man•pagnok.
Ia be•en aro na•tok palchakgipa nokko nokdonggae on•anganio a•dokni Cabinet Minister aro Williamnagar-ni MLA Marcuise N Marak, tom•anio bak ra•giparangna aganprakangengon, Chief Minister Conrad K Sangma-ni dilanichi a•doko pilakni gitan namroro silroroaniko nikna man•engaha aro tangka paisani gita dal•roroanioba 11 percent namdapaniko nikna man•aha ine aganaha.
Williamnagar jillao be•en aro na•tok pale cha•enggipa manderang, an•tangtangni bosturangko rongtalbate aro mikkim gnange palna sim•na man•na gita ia nokko rike on•anio WMB-ni Chief Executive Officer Ripamchi N Sangma aro Chairman Benedick K Sangma sakgnian mongsonggiparang ong•a ineba Marak, mittelpile aganangaha.
Antini salrango me•su samjak pale cha•enggipa manderangni neng•nikanirangko nike, Williamnagar-o me•su samjak palchakani biapko rike on•na sorkari tik ka•aha ineba Marak parakataha.
Bazar antirango rongtal an•talaniko rakkina nangani gimin janapangengon, Williamnagar-o bakan be•en den•chakani biapkoba rike on•gnok aro iana a•arangko sandimanaha ine Minister parakatenba, jabolrangko galanio municipal-ni official-rang baksa bakrimchina gita ia biapo be•en aro na•tok pale cha•enggipa manderangko didiangaha.
Ia tom•anio, East Garo Hills a•jani Deputy Commissioner RP Marak-ba jinmana aganprakengon, be•en aro na•tokrangko dongimin biaprango palna nangani gimin janapangenba, ramasamrango be•en aro na•tok palanikode high court champengatmanaha ine be•en aro na•tok pale cha•enggipa manderangko, district administration baksa bakrimchina didiangaha.
Williamnagar jillamangmangsan master plan donggipa jilla ong•ani gimin namroro silroroanioba gipinrangna bate ta•rakbatna ka•dongenga ineba Deputy Commissioner aganaha.
Ia tom•anio, East Garo Hills a•jani SP Stephen Rynjah-ba aganprakengon, ia biapo rongtal an•talaniko rakkichina gita be•en aro na•tok pale cha•giparangko didiangenba, ia be•en palchakgipa biapo ong•gija kamrangko ka•giparang donggenchimode police-rangni dakchakaniko ra•china aganangaha.
Ia tom•anio, WMB-ni Chairman Benedick K Sangma rimchaksoani kattarangko aganangaha aro CEO Ripamchi N Sangma, mittelpilani kattarangko aganangskaaha.
Na·simang iakoba nina man·gen:
Na·simang iakoba poraina man·gen: NITI Aayog-ni Dr. Arvind Virmani Meghalaya-ona re·baa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
