Shillong, May 10: Sonibar salo, Shillong Press Club, Meghalaya sorkarini Directorate of Information & Public Relations (DIPR) baksa nangrime World Press Freedom Day-ko Shillong-o manidilangaha aro ia manianio, a·dokni Information & Public Relations (I&PR) Minister Lahkmen Rymbui, mongsonggipa sokgipa ong·e bak ra·angaha.
Ia salko maniani bak gita program-ko ong·atanio, Tura-ni gitcham Lok Sabha MP aro Meghalaya State Commission for Protection of Child Rights (MSCPCR)-ni Chairperson Agatha K Sangma, DIPR-ni Director BS Sohliya, department-ni gipin official-rang, Shillong Press Club, Meghalaya Editors & Publishers Association (MEPA) aro Tura Press Club-ni member-rangba bak ra·angtokaha.
Ia tom·anio a·dokni I&PR Minister, tom·anio bak ra·giparangna aganprakengon, ia social media-ni chasongo tol·gipa koborrangko giproroatanirang batroroenganian journalism ba manderangna koborrangko on·na kam ka·anio mingsa rakbegipa ra·biani ong·enga ine aganenba, Meghalaya a·doko da·oba koborrangko on·anio jakgitelen kamko ka·na man·engkua ine parakataha.
Chengonin Meghalaya a·doko manderang jakgitele an·tangtangni nangnikanirangko aganna man·aia ine janapatengon, da·oba sorkari aro media-ni gisepo meli-nangrimgrikaniko rakkienga ine Minister aganaha.
A·gilsakni dingtang dingtang biaprango kobor ra·timgipa aro on·timgiparangko champenganirangko nikna man·engani gimn an·tangni suk ong·gijaniko parakatengon, Meghalaya a·dokode kobor ra·timgipa aro on·timgipa pilakan jakgitele kamko ka·na man·aia ine Rymbui aganaha. COVID sajinmani ja·man social media-rango ong·gija aro tol·gipa koborrangko watani batroroahani gimin journalist-rangni daitorang namen simsakbatna nangaha ineba ua aganaha.
Ia sal somoirango bang·bata changon kakket ong·gijagipa koborrangko on·engani a·selan manderangni gisepo ma·sisretani aro jajaataniko ra·baenga ineba Minister aganaha.
Internet gita tol·gipa koborrangko watanirang batroroengon, iandakgipa kamrangko champengna, pangnan kakket ong·gipa koborrangko on·china gitaba Rymbui, journalist-rangko, editor-rangko, publisher-rangko aro reporter-rangko didiangaha.
Na·simang iakoba nina man·gen:
Na·simang iakoba poraina man·gen: WJH a·jao Barato Police Outpost-na pangkamgipa campus-ko nokdonggae on·a, kror ₹24.79-ni poject-rangko a·bachengataha
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
