Agartala, Aug 2: Trinamool Congress (TMC)-ni national general secretary Abhishek Banerjee-ko Tripura a•dokni Udaipur-o donggipa Tripureswari temple-o puja ka•e Agartala-ona re•angpilengmiting somoio BJP dolna kam ka•enggipa manderang chadrapsoaha ine Sombar salo TMC matnangataha.
Agartala-o Abhishek Banerjee-ni kobor ra•timgiparangna parakatani gitade, BJP dolna kamko ka•enggipa manderang, uni gariko gol•dikrangchi chadrapsoaha aro uamangni chadrapanio Kolkata-oni re•bagipa uni sipai sakgittamba saknaanirangko man•aha.
“Angni Udaipur-o donggipa Tripureswari mite nokona re•angengmiting somoio ramarangkoba champengsoaha aro ramarangko champengna gita uamang skulo poraienggipa chatrorangkoba jakkalaha,” ine TMC-ni general secretary parakataha.
Sukrobar salo gipin dilgiparang baksa Congress doloni ong•kate TMC-o napanggipa Subal Bhowmik-ni aganani gitade, BJP-na kam ka•enggipa manderang, ong•gija dakgipa manderangko rime ramarangko champengsoenba Banerjee-ko chadrapsoahachim.
“Salgipeng Tripura-ona re•ange Agartala-ona re•angpilengmiting somoio Banerjee aro uni dolko BJP-ni manderang chadrapahaoba police-rang mamingkoba dakgija nie dongaia,” ine Bhowmik parakataha.
Subal Bhowmik an•tangba 2019 bilsio Congress dolo napna skang BJP-na kam ka•gipa ong•achim ine nikna man•a.
Indake ong•engon, TMC-ni matnanganiko BJP Gomati District Committee (Southern Tripura)-ni president Abhishek Debroy jegalatskaaha aro Sombar salo BJP-ni manderang, Tripura a•doko ma•mongni scheme-rangko chu•sokatna man•ani gimin aro COVID-ni tikarangko su•anio chu•sokgipa ong•ahani gimin jinma tom•anirangko aro uandakgipa gipin program-rangkosa ong•atahachim ine parakatskaaha.
“Banerjee-ni salgipeng Tripura-ona re•ange Agartala-ona re•bapilanio BJP-ni manderang uko champengsoa ba chadrapsoa dongjachim aro ian TMC-ni BJP-ko matnangna chalakki dakanisan ong•engnaba gnang,” ine Debroy parakataha.
