Shillong, August 2: Assam aro Meghalaya a•dokni simarango meligrikna man•jaengani gimin a•dok damgnini chief minister-rang, re•baenggipa August-ni 6 tariko Guwahati songjinmao tom•e chanchirimtaina siengon, West Khasi Hills a•jani so•sojengjeng ong•enggipa biaprangko August-ni 4 tariko, ia simarango meligrikna man•gijaniko nirokna dongimin district committee re•ange niangchenggen.

Ia committee-ko Meghalaya a•dokni Cabinet Minister Renikton Lyngdoh Tongkhar dilanggen aro uamang West Khasi Hills a•jani so•sojengjeng ong•enggipa biaprangko niangenba August-ni 5 tariko Meghalaya sorkarina report-ko on•anggen.

Adita salrangna skangsan, Assam a•dokni Chief Minister Himanta Biswa Sarma, Shillong-ona re•baenba, Meghalaya a•dokni Chief Minister Conrad K Sangma baksa, simarango meligrikna man•jaenggipani bidingo skanggipa changna agangrikangahachim aro uandaken da•o August-ni 6 tarikoba a•dokni damgnini chief minister-rang Guwahati-o tom•e chanchirimangtaina siengachim.