Tura, August 2: Garo Hills Autonomous District Council (GHADC)-ni Executive Membor Dhormonath Ch Sangma-ko Tura-ni BJP MDC Bernard N Marak, kragija dake doka ine matnangenggipani bidingo tale am•sandianiko dakchina National People’s Party (NPP) dabiangaha aro inquiry matchotkujaskal Tura-ni MDC-ko ra•galatchengchina gita didiangaha.
“Bernard Marak-ni kosako inquiry-ko dakchina chinga NPP-ni gita dabienga aro inquiry matchotkujaskal uko MDC-ni kamoniko ra•galchina nangnikenga. GHADC-ni EM Dhormonath Ch Sangma-na chinga chingni bakrimpaaniko on•enga. Ia EM-ko dokaniara GHADC aro Naguapara constituency-ni manderangko chadrapani gitaba ong•aha,” ine NPP Meghalaya State Unit-ni general secretary aro ku•wattimgipa Aldo A Sangma parakataha.
Ia a•selni bidingo Bernard-ni kosako FIR-ko ka•ahani gimin uni kosako rakbatgipa sastirangko on•china gitaba NPP, police-rangko didiangaha.
Ia a•selni bidingo talataniko on•angengon, 15th Finance Commission-ni ning•o Tura constituency-nan bang•bate tangka paisarangko chamahaoba, an•tangni constituency-na chamgimin tangka paisarangna bate Bernard dabiahachim ine NPP Meghalaya State unit-ni general secretary parakataha.
“Tangka paisarangko chame on•anide uamangni jako ong•ja aro iako GHADC-ni Chief Executive Membor (CEM) baksa agangrikchengna nanggen ine Civil Works Department-ni official-rang, Bernard-na agan-talate on•ahachim indiba ua uamangko kragija kattarangchi matnangan baksana ka•mikkenatanirangko dakaha,” ine Aldo Sangma parakataha.
GHADC-o BJP-ni saksa dilgipa ong•eba Bernard, GHADC-ni EM Dhormonath Marak-ko kragija dake dokan baksana ku•wattogija kattarangchi saiaha aro GHADC-ni engineer baksana gipin official-rangkoba ka•mikkenataha ineba NPP-ni dilgipa parakataha.
Indake ong•engon, GHADC-ni saksa dilgipako kragija dake chadrapanichi Bernard Marak, an•tangni skango bobil dake chakatani bewalko manderangna mesokaha ineba Aldo Sangma matnangataha.
Bernard saksa manderangni seokako man•gipa ong•e GHADC-ni niamrangko ma•sina nangachim ine janapatengon, “Uni iandakgipa bewalrangko mesokaniara namen kratcha•na nangani aro chubatgipa gadangonin jegalako man•na kragipa kam ong•aha. Manderangna dangdike on•engon, ua skango gita ong•gija an•tangni namgijagipa bewalko gale mandeskarangna mande ra•aniko mesokchengna nangenga,” ine NPP-ni ku•wattimgipa parakataha.
Also read:
NPP demands suspension of Bernard as MDC, inquiry for assaulting GHADC Executive Member
