Shillong, Sept 17: Cha·ani toko bikotna oil palm-ko Meghalaya a·doko gama-ge·aniko a·bachengatani bidingo a·dok sorkari da·odipet tik ka·a dongkuja ine a·dokni skotong minsiter Pa Conrad Sangma aganangaha.
Ia mamlani bidingo warachakgipa doloni Assembly-o sing·anina, Forest & Environment-ko jako ra·enggipa minister Pa James K Sangma-ni Sukrobar salo aganchakanga baksana skotong minister-ni agandapatanio, a·dok sorkari ia mamlako ning·tue tale ra·chenganiko dakna nanggen ine parakataha.
Adita salrangna skang Union Agriculture Minister-ni dongpaanio, ma·mongni DoNER minister-chi tom·dilanggipao, oil palm-ni a·bao bagan-bariko dakani aro ge·a-gamanio India sorkarini pilak dakchakanirangko on·na gita nangnikenganiko a·dok damantini skotong minister-rangna u·iatangaha ine Pa Conrad janapatjolaha.
Iako dakna gita a·dokrang jekai Arunachal Pradesh-de uamango mamingnaba jakkalgijagipa a·arang lakni lak gnang ine mesokangaha indiba an·chingni a·dok aro gipin a·dokrangde iako dakna gita namedake tale ra·chengkuani gimin aganangskaaha ineba skotong minister agandapataha.
A·doko gnanggipa buring-bolgrim biaprangni giminba sorkari gisik on·enga aro buringraragipa biap 400 sq km-oniko 500 sq kilometer-rangona baridapatanina kamrangkoba ka·enga ine aganenba, oil palm project-ni gimin jeko tik ka·na skangba manderangni janggi tangani aro an·chingni samtangtangna neng·nikanirangko nigrikesa kamko ka·gen ineba Pa Sangma ka·dongataniko on·angjolaha.
Oil palm-ko a·doko ra·baanichi buring-bolgrimrangna aro uni samtangtangna namgijanirangko ong·atnaba gnang ingipao warachakgipa dolni memborrang ia project-ko ra·chakjachina gita a·dok sorkario dabiangtokahachim.
Iandakgipako gama-ge·anichi Singapore a·songna ong·anga obostako janape agananganio, Assembly-ni agan-chalaitimgipa gitcham Pa Charles Pynrope “jekon a·gilsak gimik jechakaha uko a·dokona ra·bajaode namgen ine sorkario angni mol·molani ong·enga, beben iano bang·a tangka-paisarangko man·ani gnang indiba pilak janggi gnanggiparangna kenchakani gnangode mai namgni?” ine ua sing·doangaha.
Iana Pa James K Sangma-ni House-na ka·dongataniko on·anganio, an·chingni samtangtangna kenchakani gnanggipakode sorkari mamingba dakjawa ine aganchakangskaaha.
Ia mamlao sakgipinna maming gimaaniko ra·bagijani gimin niam gita ja·ku de·aniko department da·odipetde dakata dongkuja aro iani bidingo ma·mong sorkarini tik ka·ani aro agan-ku·pattianirangko a·dok sorkariba sengengkua ine Forest & Environment-ni minister Pa James Sangma agandapataha.
