Shillong, Jylliew 23 : U MLA barim ka West Shillong Bah Mohendro Rapsang ula wanphai biang sha ka jylli sain pyrthei ha ka sngi Ba-ar hadien ka jingleit iasoh sha ka Bharatiya Janata Party (BJP), ha ba kular ban trei na ka bynta ka roi ka par ka Meghalaya hapoh ka jingialam u Myntri Rangbah Duh Narendra Modi.
Ia u Bah Rapsang la pynrung sha ka party ha Shillong da u President ka BJP Meghalaya Rikman G Momin bad u Myntri Sorkar Bah Sanbor Shullai, ha ka jingiadon ryngkat ki nongtrei ka party bad kiwei kiwei.
Haba shim kum ka sienkam ba don burom, u Bah Rapsang ula ong ba ka rukom pyniaid ia ka synshar khadar da u Modi kala khring ia u ban wanphai biang sha ka kam shakri paidbah.
“Nga sngew burom ban iasoh bad ka BJP mynta ka 23 tarik Jylliew bad ban ieng ha ryngkat ki rishot ba khlain bad ka kiew shaphrang jong ka ri India” ula ong.
“Hapoh ka jingiohi jngai bad ka jinglong nongialam jong u Myntri Rangbah Duh Narendra Modi, ka India kala nang kiew da ka jingkhlain, jingsngew skhem bad ka jingioh burom ha ka pyrthei. Ka jingaiti jong u ban tei ia ka Ri, ka jingpyrshang ban pynkylla ia ka India sha ka ri kaba kiew bad ba shaniah halade, kala ai mynsiem ia nga ban aiti ialade ha kaban pynbteng ia ka jingshakri paidbah” bynrap u Bah Rapdang.
Une u MLA barim ka Congress, uba leit iakhun pat ia ka elekshon MLA 2023 na ka ticket ka NPP bad shah rem ha u kyrtong ka UDP Bah Paul Lyngdoh, ula ong ba ka jingpynleit jingmut jong u mynta kan long halor ka jingangnud ki paidbah ha ki shnong ki thaw.
“Ka BJP kala kren shai ba ngi hap ban sngap ia ka jingangnud jong ki paidbah bad kane ka dei ka jingthmu ba ngan jam shakhmat bad aiti ban trei naduh ka mynsiem na ka bynta ka bha ka miat jong ki paidbah” ula ong.
Haba pdiang ia ka jingwan iasoh u Bah Rapsang, u President ka BJP ula ong ba kam don satia kano kano ka jingkular ba ai ticket hapoh ka BJP.
Ula ong ba ka party ka iai plie ia ka jingkhang ia ki nongialam kiba kwah ban pynkhlain ia ka party hynrei ula ban jur ba ka jingai ticket kam dei satia kaba thikna.
“Ngi pdiang ia u MLA barim Bah Mohendro Rapsang. Ula iasoh bad ka BJP mynta ka sngi bad ngin sa iatreilang nangne shakhmat” ong u Rikman.
Pule ruh : Hiar jurip u DyCM ia ka surok ba twa ha Laitlyngkot | Thmu pyniaid noh ia ka surok na Laitkynsew
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
