25 C
Tura

Assam sorkari, ru·utgijan dambeoni bia ka·atani kosako ja·kuko de·chakatnasia

Must read

Guwahati, Jan 23: Me·chikrangko dambeoni bia ka·atani mamlarangko Assam a·doko lak baten segatgiminrang dongani gimin, ru·utgijan uandakgipa nokdangni manderangko rim·e bichalona ra·bana gita kamko ka·chakatnasiengahani gimin Assam-ni skotong minister Pa Himanta Biswa Sarma, Sombar salo aganangaha.

Iani bidingo Pa Himanta Biswa Sarma-ni Guwahati-o koborni manderangna agananganio, ru·utgijan, Assam a·dok gimikchikon dambeoni bia ka·atanirangko rim·na a·bachengatgnok aro iandakgipa mamlarangko niroke kamko ka·na gita chinga Child marriage Prohibition officer-rangko kamna seokna tik ka·aha ine parakataha.

“Dambeoni bia ka·atgiparangko rim·e bichalona ra·baani gimin cabinet tom·e chanchirimanio chinga tik ka·angaha aro iana POSCO Act-ni niamo pangchake dos dakgipako rim·chinaba Assam police-na ge·etanirangko on·manaha ine janapatenba, dambeoni me·chikrangko bia ka·atani mamlarang Assam-ni dam 10 a·jarango batenga, uni gimin da·oni dipet iani kosako chinga rakbate ja·kurangko de·atskagnok ine Assam-ni skotong minister u·iataha.

“Sandiate man·ani gitade, Dima Hasao a·jao ming 16 mamlarangko segatanirang donga baksana, Dibrugarh a·jaoba 23 percent mamlarangko segatgimin gnang ine janapatengon, a·dokoni saksa bilsi-sku ong·gipani an·o donganikoba chinga knasoaha, uni gimin, dambeoni bia ka·atanirango jak on·pagipa sakantikon chinga niamni ning·o sastirangko on·gen aro ia ong·gijagipa kamko mikkangchi a·doko champengsona gita Karnataka a·dokni dakenggipa kamoniko skie ra·enba Assam a·dokoba apsankon ja·rikatpana gita chinga tik ka·aha ineba Pa Sarma agandapataha.

More articles

-->
-->

Latest article