Tura, Feb 8: February-ni 8 tariko, West Garo Hills a•jani dam 11 constituency-rango susaenggipa candidate-rangni nomination lekkarangko Returning Officer-rangni scrutiny ka•anio ba nipilanio darang candidate-rangan jegalako man•tokjaha.
Meghalaya a•dokni Chief Minister aro South Tura constituency-ni NPP candidate Conrad K Sangma baksana a•dokni gitcham Chief Minister aro Tikrikilla constituency-ni Trinamool Congress (TMC) candidate Mukul Sangma-ni nomination-rangkoba Returning Officer-rang ra•chakangaha.
East Garo Hills a•jaoba damgittam Assembly constituency-rango susaenggipa sak 18 candidate-rangni nomination lekkarangko nipilanio darangba jegalaniko man•jaha.
East Garo Hills a•jani damgittam Assembly constituency-rango susaenggipa gimik sak 18 candidate-rangoni sakgnide me•chik candidate-rang ong•engachim.
Indake ong•engon, South Garo Hills a•jani damgittam Assembly constituency, North Garo Hills a•jani dambri Assembly constituency aro South West Garo Hills a•jani damgittam Assembly constituency-rango susaenggipa candidate-rangni nomination lekkarangko apsan salon nipilanioba candidate-rangoni saksaba jegalako man•jaha ine kobor on•timgiparang u•iataha.
Candidate-rangni nomination-rangko scrutiny ka•ani ba nipilani matchotahani gimin da•o nomination-ko ra•pilani bon•kamgipa tarikara February 10 tarik attamni 3:00 bajiona ong•skaenga aro ia somoi bon•ani ja•man joljol candidate-rangna noksarangko sualatskagnok.
