Shillong, Jan 23: Congress dolo napskana miksonge, Gambegre-ni Nationalist Congress Party (NCP) MLA Saleng A Sangma, Sombar salo, Meghalaya Legislative Assembly-o membor ong•aniko watangaha.

Ua an•tangni kam watani chittiko Assembly-ni Commissioner & Secretary Andrew Simons-ni jako on•eaha.

February-ni 27 tariko ong•atenggipa Assembly election-na skang da•o dipet a•dok gimikni sak 19 MLA-rang, kamtangtangko wataha aro uandaken da•o sak 60 MLA-rang donggipa Meghalaya Legislative Assembly-o sak 41 MLA-rangsan dongaiaha.

NCP-ni MLA ong•aoniko watangani ja•man kobor ra•timgipa manderang baksa agangrikengon, NPP-chi dilenggipa MDA sorkarini ning•o da•o ka•donganirang komia gita ong•aha ine Saleng parakataha.

“Anga an•tangba MDA sorkarini bakan ong•achim indiba bang•bata kamrangon chingkode watchanggalrongachim. Manderangba iani gimin ma•sitoka aro iako aganna ango maming kenna nanganirang dongja,” ine ua aganaha.

Dingtanganiko ra•bana kamrangko ka•anio gisik nangrongja ine Saleng, NCP-koba matnangataha.

“Dingtanganiko ra•bana gitade gisik nange kam ka•giparangkosa nangani gimin anga da•o gisik apale kam ka•giparangkosa nangenga. NCP baksa ong•ede anga maming kamrangkon jakgitele ka•na man•ja gita ong•enga, uni giminsa anga NCP-oni ong•kate MLA-ni kamkoba watengaha,” ine Gambegre-ni gitcham MLA parakataha.

Congress dolni MLA-rang wate kattokenba gipin dolrango naptokengon maini gimin ua Congress-o napskana manchiaha ine sing•on, Congress dolo una manderangna dangdike on•na gita dal•bata biapko on•gen ine Saleng parakataha.

“Gimikan Congress-ko watangtokaha indiba angade re•angpilskaenga. Saobarang angko goka ine chanchiengnaba gnang indiba angni miksonganian manderangna dangdike on•nanisa ong•enga aro Congress dolo angna dal•bata cholko on•na sienga,” ine Saleng aganaha.

Garo Hills-o Congress-na pu•ongipa manderang bang•en dongkuenga ineba Saleng a•kangataha.