23.8 C
Tura
spot_img

Diego Maradona-ko nitimgipa doctor-ni kosako sandianiko dakata

Must read

Buenos Aires, Nov 30: Robol kal·anio namen mingsing-minggama man·pilgipa Diego Maradona-ni mija antio siangani ja·man saniba jakchi so·otako man·esa siaha ine chanchichipanirang dongani gimino sianggipako dingtangmancha nitimgipa doctor-ni kosako da·o sandiatanirang ong·enga, ine Argentina-ni ukilrang aganaha.

Saako sanenggipa doctor-ni maioba simsakgijanirang donga ba donggijaniko ma·sina gita mijal Robibar salo uni nokko aro private kuligipa clinic-ko tanggitik nape police-rang sandiataniko dakataha, ine koborrangko man·soaha.

Taningo an·chi tin·kaa dongako ra·gale galna rate sananiko dakangani ja·man jasamang gapgijan niksenggipa Maradona, mija anti Butbar salo Buenos Aires-ni sambao donggiipa noktangon ka·tong saaniko man·gitike siangaha.

Maradona-ni demechik sakgittam – Dalma, Giannina aro Jana-mangoniko chimonggimin sakkiko man·chape, mamlao a·bachenge sandiataniko dakatanirang ja·man joljol doctor-ni kosako sandirikkitataniko dakna gita judge, ge·etaniko on·aha ineba ukilrang aganaha.
“Chimonggimin sakkiko man·ani gimino, uko dingtangmancha sangipa doctor Leopoldo Luque-ni nokko aro office nokko sandiatna bilrangko on·china gita mol·molaniko dakangna nangchongmotgipa ong·ataha,” ine jolni prosecutor’s office-ni koborna seachi u·iatanggipao janapataha.

Mija November 12 tariko hospital-oniko uko watpilatani mingsa a·sel dongani gimin, uni sina skang hospital-o dongmiting salrango medical staff-rang Maradona-ko konta 24-na nirokatanirang donga ba donggijako u·ina gita sandirokatgiparang jotton ka·enga ineba koborko man·sodapaha.

Emergency service-rangko ua somaio kam ka·na ja·manchakaha ine dosi on·e, mija anti Bristibar salo Maradona-ni ukil Matias Morla, 1986 bilsini World Cup-ko chedilgipa mandeni tanggitik sianganiko sandirokatchina dabiaha.

spot_img

More articles

spot_img
-->

Latest article