29.4 C
Tura
spot_img

Dzukou a•kaweo wa•al kimitna kam ka•gipa NDRF official saksa sia, Nagaland a•dokchipak wa•al kamtaia

Must read

Guwahati, Jan 6: Nagaland aro Manipur a•dokni simao donggipa Dzukou a•kaweo kamenggipa wa•alko kimitna kam ka•enggipa National Disaster Response Force (NDRF)-ni official saksa siaha ine kobor on•aha.

Koborko on•ani gitade, sianggipa NDRF-ni sipaiara Manipur a•dokoni assistant sub-inspector N Binoy Meetei ong•achim aro ua Mongolbar salo, Dzukou a•kaweona dakanggipa ramao wa•al kimitna songe dongimin a•tipo siaha. Uni post mortem-ko da•o dipet man•kujaenga ineba NDRF-ni official-rang parakataha.

“Meetei, Mongolbar pringo cha ringna gita chakatjahani gimin uko ta•raken Senapati Hospital-ona ra•angahachim indiba hospital-o uko siaha ine parakataha,” ine NDRF-ni official saksa parakataha.

Indake ong•engon, ia a•kaweni Nagaland a•dokchipak gital dake wa•al kamaniko nikna man•taiaha aro wa•alko kimitna gita Indian Air Force (IAF)-ni helicopter-rang Bambi Bucket-ko jakkale chirangko satna a•bachengtaiaha ine kobor on•aha.

Re•anggipa December 29 tarikonin ia Dzukou a•kaweo wa•al kamchakatenba ia a•brini buring bolgrimrangko kamroroangahachim ine nikna man•a. Adita salrangna skangsan, ia biapo wa•alrangko kimitna man•engaha ine official-rang parakatahachim indiba uni ja•man Nagaland a•dokchipak wa•al kamaniko nikna man•taiaha ine u•iataha.

Dzukou a•kaweo namen sin•ani gimin aro balwarang ta•rakani gimin wa•alko kimitanio kam ka•enggiparang neng•nikanirangko chagrongna nangtokenga ineba official-rang u•iataha.

Ia biapo kamenggipa wa•alko kimitna gita NDRF-ni dolsniko ia biapona watatahachim aro ia dolsnioni dolgittamde Nagaland a•dokoni ong•achim.
Ia Dzukou a•kaweara Nagaland a•dokni skotong Komiha songjinmaoni kilometre 30-mang chel•ao donggipa a•bri ong•achim aro ia biapona bang•a manderangan rona gita re•angrongachim.

spot_img

More articles

spot_img
-->

Latest article