Williamnagar, Jul 3: Sukrobar salo, Simsanggre Soil & Water Conservation Division, World Environment Day-ko maniani bak gita Environmental Awareness & Plantation Program-ko East Garo Hills a•jani Samanda Rikwarenggre songo donggipa Eklavya Model Residential School (EMRS)-o ong•atangaha.
Samtangtango ong•telaigipa sam bolrangko ripinge rakkina nangani bidingo agan-talate on•na aro bolrangko ge•dapchina didina gita ia program-ko Meghalaya sorkarini Soil & Water Conservation Department ong•ataha aro ia program-ko ong•atanio, Soil & Water Conservation Minister Marcuise N Marak, mongsonggipa sokgipa ong•e bak ra•angaha.
Ia tom•aniko, Divisional Soil & Water Conservation Officer Corbet HD Sangma dilangaha aro tom•bagiparangna rimchaksoani kattarangko, Samanda EMRS-ni Principal in-charge Sushil Kumar aganangskaaha.
Ia tom•anio a•dokni Soil & Water Conservation Minister aro Williamnagar MLA, Marcuise N Marak, jinmana aganprakangengon, ia program-na donsogimin pangchakani bidingo talataniko on•angenba, a•gilsako ding•a sin•anirang batroroenganichi neng•nikanirangko chel•chakna nangengani gimin aganangaha. Chatro chatrirangan mikkangchi a•gilsakko niroknagiparang ong•ani gimin, samtangtango ong•telaigiparangko ripinge rakkiani bidingo mikrakataniko on•na gita ia World Environment Day-ko chatro chatrirang baksa manianiara namen nangchongmotgipa ong•a ineba ua aganaha.
Intergovernmental Panel on Climate Change (IPCC)-ni sandie man•gipani bidingo agan-talatanirangko on•angengon, a•gilsakni dingtangroroenganichi namjabatsranggipa nangchakeaniko chel•chakna gitade pilak kamrangon ta•rake ja•ku de•aniko nangenga ine Marak aganaha. A•gilsakni ding•aniko 1.5° Celsius-ni ning•o rakkina gitade, 2030 bilsini gisepo greenhouse gas emission-ko 43 percent-chi komiatna aro 2050 bilsirangni a•bachengachibara carbon dioxide emission-ko komiatna nanggen ineba Minister aganaha.
World Meteorological Organisation (WMO)-ni parakatgipa kattarangni gimin janapatengon, batanggimin bilsi 10-an a•gilsako ding•batsranggipa somoi ong•aha aro ia somoirango a•gilsak gimikon chi bananirangko, akal karap ong•anirangko aro chaktopilgija ding•anirangko nikna man•aha ine Marak aganaha.
A•gilsakni ding•batroroenganiko warachakanio, buring bolgrimrangan mongsonggipa kamko ka•a ineba Marak, ia tom•anio bak ra•gipa chatro chatrirangna agan-talate on•angaha.
Bolrangko ge•engon, ge•mangmangaigija uarangko dal•atchina aro name rakkichina gitaba Minister, chatro chatrirangko didiangaha.
Program matchotani ja•man, a•dokni Soil & Water Conservation Minister, department-ni official-rang aro chatro chatrirang baksa skul campus-o bol chararangko ge•angaha.
Na·simang iakoba nina man·gen:
Na·simang iakoba poraina man·gen: A•chik actor Raj Sangma-na Most Popular Action Hero Award-ko on•a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
