Williamnagar, Dec 12: East Garo Hills a•jao, Simsanggre Soil & Water Conservation Division-ni ning•o donggipa Soil Lake Eco-Tourism Project-ko Sukrobar salo, Meghalaya a•dokni Chief Minister Conrad K Sangma oprake on•angaha aro ia project-ko oprake on•anio, Soil & Water Conservation Minister Marcuise N Marak, Soil & Water Conservation Department-ni Director L Shabong, Additional Director P Raptap, East Garo Hills a•jani Deputy Commissioner RP Marak, Superintendent of Police (SP) Stephen Rynjah aro dingtang dingtang official-rangba dongpae bak ra•angaha.
Ia Soil Lake-ara Williamnagar-o manderangni rona namnikbatsranggipa biaprangoni damsa ong•a aro ia biapko NABARD-ni dakchakanichi, Rural Infrastructure Development Fund (RIDF)-ni ning•o nambate taridapaha.
Ia project-ko oprake on•na gita program-ko ong•atanio Soil & Water Conservation department-ni Director L Shabong, rimchaksoani kattarangko aganangenba, a•doko dingtang dingtang namroro silroroani kamrangko chu•sokatna man•engani gimin a•dokni Chief Minister Conrad K Sangma-ko mittelpilangaha.
Ia tom•anio a•dokni Soil & Water Conservation Minister aro Williamnagar MLA Marcuise N Marak-ba jinmana aganprakengon, kamrang namen jakchakgija ong•genchimoba ia project-ko oprake on•na gita somoiko on•ahani gimin a•dokni Chief Minister-ko mittelpilangaha aro uni dakchakanichisa ia project chu•sokgipa ong•na man•aha ine aganaha.
Ia kamko chu•sokatna man•ahani gimin Marak, Soil & Water Conservation department-ni Commissioner & Secretary baksana gipin official-rangkoba mittelpilangaha.
Williamnagar-o damsa mingsingbatsranggipa biapko nambate taridapna man•ahani gimin a•dokni Soil & Water Conservation Minister, dingtangmancha Divisional Officer Corbeth Homa D Sangma aro uni dolkoba mittelpilangaha.
Ia tom•anio a•dokni Chief Minister Conrad K Sangma, mongsonggipa sokgipa ong•e aganprakangengon, ia nitobatate taridapgimin wari baksa Williamnagar-ni manderangko pattiahani gimin Nokgipa Isolko mittelpilangaha aro ia kamko chu•sokatahani gimin Soil & Water Conservation Minister Marcuise N Marak baksana department gimikkon mittelpilangaha.
Ia Soil Lake-ko uni pagipa PA Sangma sagiba tangatpiltaina nangnikanirang dongachim ine janapatengon, uni ia skanian da•alo ia project-ko chu•sokatna didiani gita ong•skaaha ine Chief Minister aganaha.
Meghalaya a•dokni dingtang dingtang biaprango, chiring chibisikrangko tangatpilna, ripingna aro chel•chakna gita maikai Soil & Water Conservation department kamrangko ka•enga, iarangni giminba Chief Minister, agan-talatanirangko on•angaha.
Dilgiparang changsa seokako man•ahaon, party, torom ba jat basegija pilaknan dangdike on•na nanga ine uni pagipa sagini agangipa kattarangkoba ia tom•anio Chief Minister gisik ra•atpilaha. NPP-chi dilenggipa sorkari, pilak jatrangnan maming mikkang niteani gri namroro silroroaniko on•enga ineba ua aganaha.
Meghalaya a•dokni namroro silroroaniara, a•doko songdongenggipa manderangni ku•mong nangrimani a•selsa ong•enga ine janapatengon, ia ku•mong nangrimanichi aro Williamnagar-ni MLA Marcuise N Marak-ni dilanichi Williamnagar-o bang•en namroro silroroani kamrangko nikna man•enga ine Chief Minister parakataha.
Ia program-ko ong•atani ja•man a•dokni Soil & Water Conservation Minister Marcuise N Marak, Hub News baksa agangrikengon, an•tangko MLA-na seoktaiahani gimin Williamnagar-ni manderangko mittelpilangenba, MLA election-o susana skangba ua Soil Lake-ko nitobatate taridapna skanirang dongachim ine aganaha.
2023 bilsio Soil & Water Conservation department-ko una on•ani ja•man ua, ia Soil Lake-ko taridapna gita changni chang department-ni official-rang baksa chanchirimaha ineba Marak parakataha.
Ia Soil Lake-ko nitobatate taridapaniara ia jolrango eco-tourism-ko tang•doatanisan ong•aigija ia wilwilao donggipa a•arangko aro buring bolgrimrangko tangatpilna dakchakani ong•gen ineba Marak, an•tangni ka•dongchakenganiko parakataha.
Ia Soil Lake-ko mikkangchi nambate nirokna aro chalaina gita joltangni ge•sa dolna pakwate on•gen ineba Williamnagar MLA parakataha.
Ia Soil Lake Eco-Tourism Project-ni chu•sokgipa ong•anina Marak, dingtangmancha PA Sangma sagi, Tura-ni gitcham MP Agatha K Sangma aro Chief Minister Conrad K Sangma-ko mittelpilangaha. Ia Soil Lake-ko an•tangtangni gam-jin gitan jakkalchina aro mikkangchi re•banagipa chasongrangna ripinge rakkiangkuchina gitaba Marak, Williamnagar-ni manderangko didiangaha.
Na·simang iakoba nina man·gen:
Na·simang iakoba poraina man·gen: Shillong Medical College-ko CM niea
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
