Shillong, May 19: Garo Hills Autonomous District Council (GHADC)-ko chalaianio dingtang dingtang neng•nikanirangko chagrongna nangengani gimin pilakni gitan namdapatna nanganirang dongenga ine GHADC-ni Deputy Chief Executive Membor Nikman Ch Marak parakataha.
Marak-ni aganani gitade, GHADC-o kam ka•giparangko nangana bate rakkiani a•sel, chu•onga gita tangka paisarangko man•jaengani a•sel aro jilla jolrango GHADC-ni bilrangko municipality-ni ning•o man•engani a•selba council-ko chalaianio neng•nikanirangko chagrongna nangenga.
GHADC-o nangana bate kam ka•giparangko rakkiani a•selan dormaharangko on•anioba neng•nikanirangko chagrongna nangenga ine janapatengon, gipin autonomous district council (ADC)-rang, jekai Bodo Autonomous Council aro Tripura Tribal Areas Autonomous District Council-rangode 7th Pay Commission-ko ra•gatan baksana a•dok sorkarirangba State Finance Commission-rangko songe on•ani gimin a•dokoniko bang•en man•gnirang donga ine GHADC-ni Dy CEM parakataha.
Shillong songjinmani mitam bakrangna agrede Meghalaya a•dokni pilak biaprangan Sixth Schedule ning•o ga•ake, district council-rangna niam bidiko bilko on•a ine janapatengon, district council-rang ma•mong sorkarina kajinako gamengani gimin ia kajinarangko ma•mongba a•dokna sualatskaenga aro ia kajinarangni bakko district council-na sualskaanide State Finance Commission-ni daitosa ong•a ine Marak parakataha.
ANVC aro ANVC-B dolrangni, a•dok aro ma•mong sorkarirang baksa songgigrikanio soi ka•grikgipani gimin janapatskaengon, ia songgigrikanion State Finance Commission-ko songna aro GHADC gita dakgipa district council-rangna apsan ong•e tangka paisarangko sualna niamko donahachim ine Marak aganaha. Ia kamrangko chu•sokate on•genchimode ADC-rangba gipinrangoni ja•manchakjawachim ine ua aganaha.
Garo Hills-ni bang•bata jillarangon district council-rangni bilko municipality-rang ra•sekahani a•selan dingtang dingtang namroro silroroani scheme-rangko chu•sokatanio neng•nikanirangko chagrongna nangenga ineba GHADC-ni Dy CEM aganaha.
Indake ong•engon, May-ni 20 tariko uamang a•dokni District Council Affairs Minister baksa tom•aniko ong•atenga aro ia tom•anio uamang, dingtang dingtang neng•nikanirangko chanchirime namatna ka•dongenga ine Marak parakataha.
Na·simang ia video-koba nina man·gen:
Na·simang iakoba poraina man·gen: AASU-ni gitcham general secretary-ko rim•a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
