23.2 C
Tura
spot_img

GHADC-ni ning•o kam ka•enggiparangni strike ong•atna tik ka•giminko, Budget session-ni matchotaona sengna tik ka•a

Must read

Tura, Feb 17: Garo Hills Autonomous District Council (GHADC)-ni ning•o kam ka•e cha•enggiparangni man•gni bangki betonrangko on•kujaengni gimin Strike-ko ong•atna ka•mikkenatengani gisepon, ia bilsini Budget session-ko Sombar salo ong•atna gita tik ka•aha.

Non-Gazetted Employees Association-ni ning•o dakchakaniko man•e kam ka•enggipa manderang, uamangni office-ni ka•gni kamrangko mikkang antioni dipet dondikatna gita tik ka•mangenchimoba, Sombar salo, GHADC-ni ning•o ong•gipa dingtang dingtang Department-rangna tangka paisarangko tikatna budget session-ko ong•atengahani gimin, gipin ja•kuko ga•na skang ia session matchotaona sengkuna inenba dingchaoenggipa employee-rang tik ka•angskaaha.

Indake, ia strike-ko ong•atna tik ka•engon, GHADC-ko chalaienggipa NPP dolni dilenggipa Executive Committee (EC) aro Council-ko jako ra•e kam ka•enggipa Authority-rang, bangki dongenggipa betonko on•a ku•rachakatangko chu•sokatkujaenga ine matnangenggipa, Employees Association-ni dilgiparang baksa nanggrikani ong•skaaha.

“Employees Association-ni gita chingna ia strike-ni bidingo mamingkoba u•iata dongja aro tom•e chanchirimaniko dakna u•itaba dongja, iani bidingo gipin cholrangchisa chinga u•ina man•aha” inenba GHADC-ni Chief Executive Member, Albinush R Marak aganaha.

GHADC-ni ning•o kam ka•e cha•enggiparang ja 32-ni betonrangko man•a gita nangengkuachim aro batanggimin bilsini December jao Christmas-na skangmangmang jagnini man•a nangenggipa betonko on•aha, indake, bilsi gitalni January jao jagnini man•gniko on•a EC-ni ku•chakangahachim jekon uamang da•ona chu•sokatkuja inenba jingjengatenggipa dolrang parakataha.

Indake ong•engon, Chief Executive Member, Albinush R Marak, a•dok sorkarini tangka paisachi dakchakaniko on•genchimosa aro chamatjokosa na•simangni betonko watatskagen inenba ku•rachakaniko pangnan on•ronga. Ia somoio, pilak skulrangan aro college-rangan kulitokengaha aro admission-rangko ka•na tangka paisarangko nangani gimin, a•dok sorkarini gita tangka paisarangko chamatgen ine ka•dongsoenga inenba Marak aganaha. Indake, Skotong Minister Conrad K Sangma-ni Tura-ona re•bahaon, uko grongenba iani bidingo chinga agangolpogriken ine janapatan baksa, iandake dal•begipa grojinangko ta•rake gamatna ba matchotatnade, mande gitade amjawa inenba CEM agandapataha.

Una agreba, ia Office-o chingni EC ong•e kam ka•chengaoni, tenure-rang komigenchimoba chingni bil ama gita ja 34-ni betonrangko on•a man•aha ine talataniko on•an baksa, da•o ja 30-ni bangki dongkuenggipa betonrangde, batanggimin GHADC-ni EC-rangni jako ra•e ka•gipaonisa aro uarangko da•alo chinga gamna nangengaha ineba Marak aganataha.

Na·simang Ia Video-koba Nibo:

Na·simang Iakoba poraie nina man·gen: Badingchiwalna nanggipa kamrangko alturiri ong•atanian sorkarini mongsong dakgni ong•a: Dr Mukul Sangma

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter-twitter.com/nemediahub

Youtube channel- www.youtube.com/@NortheastMediaHub2020

spot_img

More articles

spot_img
-->

Latest article