25.7 C
Tura
spot_img

GHADC-o kam ka•giparang jasani dormahako ra•na jechakaha, komibeoba ja 3-ni dormahako on•china dabia

Must read

Tura, Dec 14: Garo Hills Autonomous District Council (GHADC)-o kam ka•enggiparangna ja 30 batpile dormaharangko on•na nangkuengoba da•o Krismasna skang jasani dormahakosan on•na ku•rachakahani gimin GHADC-o kam ka•enggiparang Sombar pringni bako jinma tom•e chanchirimangenba, jasani dormahako ra•na jechaktokaha aro revised salary ba gital taritaigimin dormahaoniko komibeoba jagittamni dormahako on•china dabiangtokaha.

Ia tom•aniko Non-Gazetted Employees Association (NGEA) dakdilangaha aro ia tom•anio NGEA-ni dilgiparang, da•o ong•enggipa GHADC-ni secretary Rikse R Marak-ko salgnini gisepon kamoniko ra•galchina gitaba dabiangtokaha.

GHADC-o kam ka•enggiparangna gitcham dormahaonikon jasaniko on•gen ine adita salrangna skangsan GHADC-ni Administrator parakatahachim indiba GHADC-o kam ka•enggiparang, ja 30 batpile dormaharangko man•kujaengani gimin ia jasani dormahakode ra•na jechaktokaha.

“Ru•uta bilsirangonin GHADC-o kam ka•giparangna dormaharangko bariata dongkujani gimin dormaharangko bariate on•gnok ine aganmanahachim indide maini gimin da•o chingna gitcham dormahaoniko jasanikosan on•na miksongenga?” ine NGEA-ni dilgiparang sing•doatenba, GHADC-o kam ka•giparangna dormahako on•genchimode gital taritaigimin dormahaoniko komibeoba jagittamni dormahako on•na nanggen ine dabiangaha.

GHADC-o kam ka•enggiparangna ja 30 batpile dormaharangko on•kujaengoba jasani dormahakosan on•na gita ku•rachakahani gimin adita salrangna skangsan komibeoba sak 14 kam ka•giparangde kamtangtangko watna gita chittiko seatmanahachim.

Kamtangtangko watgipa manderangoni mitamrangde LDA, Mondol aro muster roll worker-rang ong•achim ine u•iataha.

spot_img

More articles

spot_img
-->

Latest article