Baghmara, Jan 9: Ru·uta somoirangoni jolni manderangni ka·oksie nichaksoenggipa Greater Baghmara Water Supply Project-ko, Siju-Rongara-ni MLA Pa Rakkam A Sangma aro gipin a·gipi dilgiparang aro sorkarini officialrang gimikni dongpaanio, Meghalaya-ni skotong minister Pa Conrad K Sangma, Sombar salo a·bachengate on·angaha.
We are happy to complete this project within 2 years of laying its foundation! This is the thrust in development that we are prioritising for areas left behind and ensuring our people reap the benefits of our promises!
— Conrad Sangma (@SangmaConrad) January 9, 2023
Ia project-ko a·bachengatanichi Baghmara-ni ning·o donggipa song dam 16 mangni gita rongtalgipa chirangko chu·onga gita man·gnok.
Songni manderangna rongtalgipa chirangko sale on·na gita miksonge a·bachengatgipa project-ko bilsi-gnini gisepo matchotate on·na man·ahanina skotong minister an·tangni kusi ong·aniko parakatan baksa, rakbee kamrangko ka·anichi ia kamko matchotatanio bak man·pagipa PHE department aro contractor-rangkoba skotong minister, dingtangmancha mittelpilangaha.
Apsan salon, Meghalaya-ni skotong minister, South Garo Hills a·jani skotong Baghmara-ni gital Circuit House baksana Housing Department-ni Middle Income Group-ni nokkoba nokdonggae on·angjolaha.
