Guwahati, Dec 29: Guwahati-ni gital airport terminal-ona sokbagipa songre-songgabatgiparangde steel, glass ba digital screen-rangko nikechengjaha. Uni palo, uamang wa•aoniko tarigipa krongrangkosa nikea – jean nina nitoa, sam gri dal•atgimin ong•a aro Salgro Salaram-o janggi tangani bewalo pangchake tarigimin ong•a.
Lokpriya Gopinath Bordoloi International Airport-ni New Integrated Terminal Building-o (NITB) ia tarianirangko dakaha, aro iani tarigimin Bamboo Village Vault-rangan India-ni international airport-rangoni gisepo dal•batgipa ong•a. Ia rikanirangko baina aro naljoke rakkina a•dokni rakbatgipa niamrango pangchake dakaha, aro ia project jinmani daka-rikanirango pangkamgipa cholrangko jakkalaniko mesoka.
Ia wa•achi tarianirangko Guwahati-o bol-wa•ani kamko ka•gipa CanBoo minggipa jako ra•aha, aro iandake dakanichi ong•telaigipa wa•arangko scientific bewalo taridape mande bang•gipa biaprango jakkalgipa rod aro silrang gita apsan gadangon jakkalna man•a ine mesoka.
“Wa•arangara nangchongmotgipa ba jatni dakbewalrango jakkalgipa bostu ong•a. Ia project-ko ka•anichi wa•arangko airport-rango naljoke, baie, aro nitoe tarina man•a ine mesoka. Ian chengo jakkalaiagipa bostusan ong•aija indiba mikkangchi jakkalgipaba ong•a,” inr CanBoo-ni Founder aro Director aganangaha.
Ia terminal-ko rikanio 85 percent-mangni gitade ong•telaigipa wa•arangko jakkala. Iano Assam-ni Bhuluka aro Jati (Tulda) wa•arangko, aro Arunachal Pradesh-ni Ziro-ni Apatani wa•arangko jakkalenba biaptango bading-chiwalgiparangna dakchaka baksana a•gilsakko nisianiko komiata.
Ia wa•ani krongrang nitoatna tarigiparang ong•ja. Uarangko Assamese song damsao janggi tanganiko nie tariaha aro ian Salgro Salaram-ona re•bagipana mesokchengani ong•a. Bang•a songre-songgabate sokbagiparang neng•take nokkingrangko jachipchang ra•chengesa bostutangtangko ra•ena re•anganirangko nikna man•aha, ian airport-rango nikronggijagipa ong•a.
Terminal-ko tariani bewalko salani kamrangko Adani Group jako ra•aha jekon gital chasongni engineering-ni bewal baksa biaptangni dakbewalrangko dakbrine tariaha. Re•chakatenggipa biaprangkode namgipa aro bilakgipa bosturangko jakkale tariaha, aro sokchakegipa biapko biaptango daka-rikani bewalko ja•rike tariaha.
Tarigimin wa•arangni ning•ao bilakgipa pangchakanirangko rikaha. Scientific bewalo taridapgimin wa•ani bosturangko steel-ni sub-frame-rango gatchake, wa•al, naljokani, jrimako ra•chakani aro baianiko man•chakna gita tariaha. Ia tarigimin bimangrangko namedake rakkianichia bilsi 15-rangna baina gita tariaha, aro ian gipin airport-rango gitan apsana.
Ia tarianirangko dakani namen rakbegipa kam ong•aha. Ong•telaigipa wa•arangko namedake taridapna, aro dangdikna nanga. Ia neng•nikanirangko man•genchimoba, bang•bata kamrangkon donsogimin somoirangni gisepon matchotatna man•aha, aro iano CanBoo-an mongsonggipa chanchidilgipa ong•e architect-rang, engineer-rang, contractor-rang aro jakni kamrangko ka•giparang baksa ku•mongrime dakaha.
Assam, Arunachal Pradeah, Nagaland aro Manipur-oni kam ka•giparang ia project-o bak ra•e dingtang dingtang tribal dolrangni palo kam ka•eaha.
“Pangkamgipa janggi tangani bewal ba sustainable development-ko manderangni janggi tangani cholrangoniko ekatna man•ja. Ia kamrangko ka•anichi ru•uta bilsirangna skie ra•ani, a•gilsak gimik baksa bakrimani aro Salgro Salaram-o songdonggipa jatrangni jakni kamrangko changa-sapaniko mesoka,” ine Salam parakataha.
Meghalaya gita a•briarigipa a•dokrango kenani gnanggipa a•bri-a•kongrangko nichenggija daka-rikanirang dal•roroatengon, ia Guwahati-ni airport-ko tariani bewal namgipa bewalo daka-rikaniko mesoka ine jillarango daka-rikanirangko chanchidile kam ka•gipa aro pangkamgipa janggi tangani cholrangko ranta ka•e janggi tanggiparang aganaha.
Karirangni sin•a-ding•ani dingtangrorobaenggipa biapo, a•palchini ra•bagipa bosturango pangchakgija biaptangni bosturangko jakkale, science aro engineering-ko dondime daka-rikanichi public-ni biaprang ba daka-rikanirangko gital bewalo tarina man•a ine ia Guwahati airport-o gital tarianirangan mesoke on•enga.
Na·simang iakoba nina man·gen:
Na·simang iakoba poraina man·gen: India-ni PM uni Radio program “Man Ki Baat”-o Manipur-ni me·chikrangko bading chiwalaniko a·bachengatanina ra·doe agananga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
