Donkam ban long kiba iai shah, ong u Bah Lahkmen Rymbui

Shillong, Jylliew 09 : U Myntri Sorkar bad MLA ka Amlarem Bah Lahkmen Rymbui ha ka sngi Ba-ar, ula kubur ba ka kam jngohkai bad ka kamai kajih ki trai shnong ha Dawki bad ki jaka ba marjan, kala shah ktah bha namar ka jingpyntrei ia ka surok Shillong-Dawki kaba dang iaid shaid shaiad mynta hynrei ula kyntu ban long kiba iai shah namar ka jingpyntrei ia ka surok ka dang iaid.

Haba kren sha ki nongthoh khubor, u Bah Lahkmen ula ong ba ka Sorkar Jylla bad Sorkar Pdeng kila ithuh ia ka jinglong kongsan ka kam jngohkai, hynrei ki jingtei ki dei kiba wan nyngkong eh.

“Ka Meghalaya ka dei kaba la kyrkhu da ka mariang ba itynnad kaba ngi don, hynrei haba ong kumta, ka Sorkar Meghalaya bad ka Sorkar India kala ithuh ia ka jinglong kongsan ka kam jngohkai. Hynrei ngin ym lah ban pynroi ia ka kam jngohkai khlem ki surok kiba bha, ka telecommunication bad kiwei kiwei ki jingdonkam ba kongsan” ula ong.

U Myntri ula pynpaw ia ka jingsngewnguh ia ka Sorkar Pdeng namar ka jingbei pisa ia ka surok Shillong-Tamabil, kaba ka jingpyntrei mynta ka dang iaid shakhmat. Ula kubur ba ka jingpyntrei ia kane ka surok kala ktah bha ia ka jingwan poi ki nongjngohkai bad ka kamai kajih ki trai shnong.

“Hooid, ia mynta ka jingwan poi ki nongjngohkai kala duna bha, ka kamai kajih ki briew ruh kala shah ktah, hynrei ka long kaba donkam ia ngi ban long kiba iai shah” ong u Bah Rymbui.

“Ka jingiai shah ka long ba mynta nga la iohi ba ki kam kila iaid bha bad nga kyrmen ba ha ka por ba lyngkot eh, ki contractor kin sa lah ban pyndep ia ka kam” ula bynrap.

U Bah Lahkmen ula kren ruh halor ka jingshngain namar ka jingshong synjor ka khyndew ha ka thain, haba pynpaw ba wat u slap uba rit ruh, u lah ban wanrah ia ka jingtwa khyndew bad kala don ruh ka jingiap ki briew ha ka por ba pyntrei ia ka surok. Ula ban jur ia ka jingdonkam ban long kiba phikir bha.

“Hynrei ia mynta, ka ktah ym tang ia ka Dawki, ka Mawlynnong bad kiwei ruh ki jaka kila shah ktah” ula ong.

U Myntri ula ong ba ka dei ka jingkitkhlieh jong ki Sub Divisional Magistrate bad ka Sorkar ban pynthikna ia ka jingshngain bad ban pyndep kloi ia ka kam.