Tura, Dec 4: Be·enni gita bilgrie atchigiparangni salko chong·motan, International Day for Persons with Disabilities-ko bilsianti December 3 tariko a·gilsak gimikchi manirongengon, a·songni dingtang dingtang biaprango gitan South West Garo Hills a·jani Gandhipara songoba mija Sonibar salo maniangpaaha.
Ia dingtangmanchagipa salko gisik ra·e manianganio, A·chik a·songoni be·enni bilgrie atchigipa aro uamangni dingtangmancha ong·e changa-sapanirangchi a·doktangna aro joltangna mikkim-rasongko ra·barongenggipa adita sak manderang bakko ra·angtokaha.
Indian Blind Football Federation-na a·songgipinchi mikgrirangni robol kal·susaaniko ong·atgipa bakko ra·e kal·ronggipa aro Rongbakgre songoni saksa bilsi 24 ong·gipa Jebilbang M Sangma, batanggimin somoirango a·songgipinchi robol kal·susaatanio bang·en bakko ra·enba a·songtangna mikkim-rasongko ra·baaha. Indake, programo bakko ra·e Jebilbang Sangma, an·tang gita be·enni gita bilgrie atchigiparangko nichanggalgija apsan ka·saanikon on·china gita ma·gipa-pagiparangko didia gnang an·tangni tarigimin gitko manderangna ring·e mesokangaha.
Apsandake, Indian Blind Football Federation-na a·songgipino ong·atgipa mikgrirangna robol ka·susaatanio bakko ra·e kal·ronggipa sakgipin Rongsepgre songoni bilsi 26 ong·gipa Kilingson D Marak, jean kal·gipa dolni captain gitchamba ong·a, mija Sonibar salo ia salko Gandhipara songo manianganio sakgipirangna didiani kattarangko aganangskaaha.
Kilingson Marak, ru·utgija salrangna skang matchotanggipa Asian Championship-oba bakko ra·e kal·angaha. Indake, re·baenggipa bilsio China a·songo ong·nasienggipa Paralympics-o ua, a·songni pal ong·e kal·angtainasienga.
