Shillong, Sep 16: Mongolbar salo, Shillong songjinmao donggipa National People’s Party (NPP)-ni office-o tom•aniko ong•atangenba, Outer Manipur-ni gitcham Lok Sabha MP Dr Lorho S Pfoze-ko NPP-ni national president Conrad K Sangma, party-ona rimchaksoaha.
Dr Lorho-na rimchaksoani kattarangko aganangengon, Dr Lorho saksa manderangna dangdike on•anio kamrangko ma•sigipa ong•ani gimin uni NPP-ona re•baaniara salgro salaram jolni manderangna kamko ka•anio party-ko mangrakbatatna dakchakani ong•gnok ine NPP-ni national president aro Meghalaya a•dokni Chief Minister Conrad Sangma aganaha.
Dingtang dingtang ra•bianirangko chagrongna nangengoba NPP, salgro salaramni pilak kona noksikrangon kamrangko dangdike on•na man•enga ine janapatengon, ia party manderangni ka•donganiko man•aha aro salgro salaram jolni manderangna ku•rangko on•na gita cholko on•gipa gita ong•aha ine Sangma aganaha.
Dr Lorho-ni re•baanichi NPP-na bang•en namgni ong•gen aro salgro salaramna ku•cholsan ong•e ku•rangko on•na mangrakbatatani ong•gen ineba ua an•tangni ka•dongchakenganiko parakataha.
Manipur a•doko dingtang dingtang dilgiparang donga ine janapatskaengon, Dr Lorho-ko Manipur a•doko uni kakket ong•anina aro manderangna dangdike on•na skanirang dongani gimin pilak jatrangan namniktoka ine Sangma aganaha.
NPP-ko salgro salaram jolrangna ku•rang on•ani chol ine janapatengon, NPP-ni gitcham dilgipa Purno Agitok Sangma an•tangan salgro salaram jolni manderangna ku•rangko on•anio kolgapgijaniko gapatna miksonganiosa ia party-ko bikotaha ine NPP-ni national president parakataha.
Da•alo NPP, salgro salaramni pilak biaprangonan gipangaha aro dingtang dingtang jatni manderang, ia party-o naptokaha ineba ua aganaha.
Ia tom•anio Dr Lorho-ba jinmana aganprakengon, an•tangko mande ra•bee rimchaksoahani gimin NPP-ni national president aro dingtang dingtang dilgiparangko mittelpilangenba, ia party salgro salaram jolo songdongenggipa mande sakantina, Tribal manderangna aro pilak Tribal jatrangnan ong•china ine aganaha.
Purno Agitok Sangma-ni niksamsoanian salgro salaram jolni manderang pilaknan didiani ong•a ine janapatengon, salgro salaram jolo songdongenggipa Tribal jatrang pilakan ku•cholsan ong•e kamko ka•na nanga ine Dr Lorho aganaha.
Ia tom•anio, NPP-ni national working president James K Sangma, NPP Meghalaya-ni state president aro Deputy Chief Minister Prestone Tynsong, NPP-ni dal•dalgipa membor-rang, Meghalaya a•dokni minister-rang, Manipur-ni NPP MLA-rang aro gipinrangba dongpae bak ra•angtokaha.
Na·simang iakoba nina man·gen:
Na·simang iakoba poraina man·gen: Bangladesh-ni chatro-chatrirangko kajia-golmal ong·atanina NIT Silchar-oniko suspend ka·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
