Shillong, Mar 25: Khasi Hills Autonomous District Council (KHADC)-o Mawlai-ni MDC ong•enggipa Teiborlang Pathaw, Sukrobar salo National People’s Party (NPP)-o napangaha aro uko NPP-ni national president Conrad K Sangma, NPP-ona rimchaksoaha.
Mawlai MDC-ko NPP-ona rimchaksoani somoio NPP-ni national president aro Meghalaya a•dokni Chief Minister Conrad K Sangma, jinmana aganprakengon, re•baenggipa 2023 bilsini Meghalaya Legislative Assembly-o Teiborlang Pathaw-an Mawlai constituency-oni NPP-ni candidate ong•e susagen ine parakataha.
Mawlai MDC-ko NPP-ona rimchaksoani somoio NPP-ni national vice president Prestone Tynsong, working president Sniawbhalang Dhar aro gipinrangba dongpae bak ra•angaha.
Mawlai-ni MDC, ritchani ritcha chadamberangna janggi tangani cholrangko on•e songsalna bang•en dangdike on•aha ine janapatengon, manderangni nangnikanirangko chu•sokate on•gipa mandesa chong•mot dilgipani gunko mesoka ine Sangma parakataha.
Batanggimin bilsibrina sorkariko chalaianio NPP-chi dilenggipa MDA sorkari, jegalenggipa dolrangni kosako maming dakeba bilko jakkalna nangjaha ine janapatengon, jegita sorkarini kosako jegalani aro jingjengatanirangko dakgenchimoba ia sorkari, dosgri manderangna neng•nikanirangko ra•bajana gita jotton ka•aha aro batesa manderangni nangnikanirangko knachakna gita nachil songaha ine a•dokni Chief Minister parakataha.
Manderangna nachil songahani giminsa bang•bata dilgiparangan NPP-ona re•batokenga ineba Sangma aganaha.
