Shillong, Oct 6: Meghalaya a•dokni damgittam Assembly constituency-rang, chong•motan Rajabala, Mawryngkneng aro Mawphlang constituency-ni bye-election-ko re•baenggipa October-ni 30 tariko ong•atengani gimin a•dokni pilak political dolrangan kamrangko ka•chichatoksoengahaon, United Democratic Party (UDP)-de Mawryngkneng bye-election-o susagija National People’s Party (NPP)-ni candidate-na kamko ka•skagen ine Budbar salo parakataha.
UDP-ni president Metbah Lyngdoh-ni kobor ra•timgiparangna parakatani gitade, Mawryngkneng bye-election-ode UDP-ni candidate-ko susaatgija NPP-ni candidate Pyniaid Syiem-nan kamko ka•na Mawryngkneng-o UDP-ko dilenggiparangba nangniktokenga.
Mawphlang bye-election-na UDP-ni tikitko sianggipa MLA SK Sunn-ni depante Eugeneson Lyngdoh-na on•e Rajabala bye-election-nade Congress MDC Ashahel D Shira-na on•skaaha ine Budbar salo parakatahachim.
Indake ong•engon, Mawphlang bye-election-o susana gita UDP-ni candidate Eugeneson Lyngdoh-ba Budbar salon, an•tangni nomination-ko East Khasi Hills a•jani DC office-o on•eaha. Uni lekkarangko on•eani somoio UDP-ni general secretary Jemino Mawthoh, UDP Minister Lahkmen Rymbui aro gipinrangba dongpaeaha.
