Resubelpara, August 17: Sonibar salo North Garo Hills a·jani Mendipathar antidamo, Mendipathar Block Congress Committee-ni Congress Bhawan-ko Meghalaya Pradesh Congress Committee-ni (MPCC) President, Vincent H Pala oprake on·angaha. Tura Parliamentary Constituency-ni MP Saleng A. Sangma ia tom·aniona mongsonggipa sokgipa ong·aha aro unbaksana MPCC-ni Working President Deborah C Marak-ba dongpae bak ra·angaha.
Uamangna agreba, Shillong, Tura aro dingtang dingtang biaprangoni Congress-ni gitcham dilgiparang, North Garo Hills a·jani songrangoni ma·giparang, pagiparang aro chadamberangba re·bae ia tom·anio bak ra·angaha.
Mongsonggipa sokgipa ong·e, Saleng A Sangma jinmana aganprakengon, ua ia Congress Bhawan-ko pattiahanina Nokgipa Isolko mitelaha. Uandake ua ia Bhawan-ko rikanio namgipa ku·pattianirangko on·anina aro dingchike kamrangko ka·dilanichi chu·sokaniko man·ahanina aro namgipa bimangko ong·atna man·ahanina MPCC-ni President Vincent H Pala-ko mitelaha aro ia Congress Bhawanko nikna ske kamrang ka·anggipa a·gilsakko wate re·anggimin gitcham dilgiparangko aro uamangni nokni manderangkoba mitelaha. Una agreba ua MPCC-ni Working President Deborah C Marak, aro gitcham MLA aro MDCrang, aro a·ja ge·anti, Block ge·anti aro songantini dilgiparangkoba mitelangaha.
Ia Congress Bhawan-ko rikanio Mendipathar-ni gitcham MLA Frankenstein Momin-ni Congress Bhawan-ko rikna a·arangko ra·e donangani giminsa da·o bimang ong·aniko nikna man·enga ineba Saleng A Sangma janapenba uko mitelaha.
Uandake ua gitcham salrangko nipilate, da·ororoni dal·dalgipa dilgiparang gimikan Congress dolonisa ong·baa ine janapenba, sianggipa PA Sangma sagi-ba ru·uta bilsirangna Congress-o bak ra·enba Union Minister, Lok Sabha-ni Speaker aro a·dokni skotong minister-ba ong·angjok, indiba uni degiparang aro ja·rikgiparang Congress-ko mitelani pal batesa matnange aro mitake roenga ine aganaha.
Una agreba, Saleng A Sangma, Captain Williamson A. Sangma-ni Garo Hills-ona Congress-ko ra·bachengani kattarangkoba aganangaha. Uni janggi tanganio ua a·songna jatna kakket ong·e, mamung mikbokani gri re·dilangaha, aro noktangni manderangko saksakoba an·tangni a·bao kam ka·na tariangjaha aro ugita dake an·tangko on·kange kam ka·gipako A·chik a·songo man·jawahakon ine ua aganaha.
Apsandaken, ua a·dokni skotong minister gitcham Salseng Marakkoba mitele aganangaha aro bang·a gitcham dilgiparangan Congress dolonin ong·a ine uamangni a·songko jatko re·dilanganiko gisik ra·atpilaniko dakaha.
Na·simang iakoba nina man·gen:
Na·simang iakoba poraina man·gen: Tura Football League-ni 1st Division-o Araimile SCC chegipa ong·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
