Tura, May 22: Meghalaya-ni Skotong Minister Conrad K Sangma, Sukrobar salo tangka kror 150-na bate chamgimin dingtang dingtang project-rangko Tura songjinmao a∙bachengatna pangchakani ro∙ongrangko songe on∙angaha.

Ia tom∙bimonganio GHADC-ni CEM, MDC-rang, Tura Municipal Board-ni Chairman J. D. Sangma, Department of Urban Affairs-ni senior official-rang, dingtang dingtang dolrangni manderang, songni-nokni dilgiparang, artist-rang aro dingtang dingtang gittimrango songdonggipa manderang re∙bae bak ra∙angaha.

Ia programme-ko ong∙atani somoio, skotong minister minggittam mongsonggipa project-rangni pangchakani ro∙ongrangko oprake on∙angaha, iarangara, Najing Bazar-ko namdapatani, Dakopgre-o multi-level parking aro cinema complex-ko rikani aro SMELC Complex-ko taridapani ong∙a. Una agreba a∙doko changgipa-sapgiparangna dakchakaniko on∙na ine ua Chief Minister’s Artists Engagement Scheme-ni ning∙o  artist-rangna cheque-rangko sualataha, aro manderangna kam ka∙anirangko namdapatna aro digital governance-ko gipatna Tura Municipal Board Mobile Application-ko oprake on∙angaha.

Jinmana parake aganatengon, sorkariko rikanio manderangko skotong donna nanga aro songdonggipa manderang baksa pil∙nipil ku∙mongrime agangrikanirangko dakna nanga ine, songdonggipa sakprakan sorkari baksa agangrikna cholko man∙na nanga ine chanchie CM Connect-ko a∙bachengataha ine Skotong Minister Conrad K. Sangma aganaha. Manderangni neng∙nikanirangko sorkarina u∙iatna dingtangmancha chol donggenchimosa, sorkari uarangko segate, niroke aro somoi gita namate on∙na man∙gen ine ua talataha.

Uandake, CM Connect 1971 call centre-o, mande sakprakni janapatenggipa neng∙nikanirangko segate ra∙a, nanggipa department-rangna watata, aro uko namate on∙jana kingkingde sandianirangko daka ine ua talate on∙angaha.

Una agreba, CM Connect Field programme-rangko ra∙baanichi, manderang baksa agangrikanirangko bilakbatatna ine sorkari kam ka∙enga ineba ua aganangaha. Manderangna nambata cholrangko on∙na, CM Connect Office-rangko a∙doko donggipa dam 56 block-rangon a∙bachengatgen, jedakode manderangna dakchakani cholrangko sepangbatatna man∙gen aro uamang dingtang dingtang nangchongmotgipa kamrangna a∙jani skotongona re∙angna nangjawa ine Skotong Minister aganaha.

Sorkarini dingtang dingtang kamrangko ka∙na digital cholrangko chu∙gimik jakkalna krengenga jedakode kamrangko nambate, ta∙rakbate aro donnua gri ka∙na man∙gen aro songdonggipa manderangba sorkariko rikanio chagrongenggipa neng∙nikanirangko namatna cholrangko sandina dakchakna man∙gen ineba ua agandapaha.

Tura songjinmao namroro-silroroaniko ra∙baani bidingo janapengon, batanggimin bilsi chetni gisepo songjinmako namdapatna kamrangko ka∙engaha aro mikkangchinaba ka∙angkuenga ine skotong minister aganaha.

Held a meaningful CM Connect Public Consultative Meeting in Tura where citizens, community representatives, and stakeholders came together to directly share their concerns, suggestions, and aspirations for the development of Tura.

The discussions focused on improving civic… pic.twitter.com/kZQkH0mPkN

— Conrad K Sangma (@SangmaConrad) May 22, 2026

Mongsonggipa daka-rikani kamrangko a∙bachengatna pangchakanirangko songon, Najing Bazar Redevelopment Project-na Kror 60.76 tangkarangko chammaha, jechin ua jolo bading-chiwalani biaprang, gari donchakanirang, rochakanirang, palbadinggiparangni biaprang aro paikanarang, ringani chirang aro uandakgiparangko tarianggen. Ia project-ni ning∙ao commercial complex-ko rikgen jeni ka∙mabatgipa gadango bol 40 truck-rangko donchakani biapko tarigen, bol 50 chonchongipa garirangko donchakani biap, palang ge 70-mang donggipa hotel, multipurpose banquet hall jeon sak 500 manderangko chakgen, ge 200 dokkanrang aro una agreba palbadinggiparangna biaprang donggen.

Unbaksana, Dakopgre-o kror 51.21 tangkarangchi Multi-Level Car Parking aro Cinema Complex-ko rikgen ine skotong minister janapaha. Ia project-ni ning∙ao bol 200 chonchongipa garirangko donchakani biap baksana damprako sak 125 asongna chakgipa cinema hall damgittam, gaming zone aro cha∙chakani biaprangko tarigen, jean manderangko altuae re∙rurana dakchaka baksana somoirangko re∙ate roenba ua biapo bading-chiwalgiparangni pala-sim∙anirangko nambatatna dakchakgen.

Una agreba, manderangna skie ra∙chakna, aro jinmarangna tom∙dakanirangko dakna dakchakna gita SMELC building-ko taridapanian dakna nangchongmotgipa kam ong∙a inenba, iano taridapanirangko dake Art and Culture Promenade, museum, bi∙sarangna rochakani, CM Youth Centre aro bilsi ja∙delgiminrangna Active Ageing Centre-ko rikani korosrang gong kror 150mang ong∙nasia ine ua aganaha.

Chief Minister’s Artists Engagement Scheme-ni ning∙ao, sorkarini dingtang dingtang nokrangni aro sorokrangni pakmarango noksa salanirang aro uandakgiparangko dakanichi joltangni artist-rangna sorkari janggi tangani cholrangko on∙enga baksana, joltangni nitoanio rasong chana aro bak ra∙naba cholrangko on∙enga ine skotong minister aganangaha. Artist-rangna uamangni changa-sapani gadangni kri tangka-paisarangkoba on∙e dakchakenga ine ua talate on∙angaha.

Songjinmako rongtal-an∙tale rakkiani bidingo janapengon, gittimtangtangko namedake rongtal-an∙tale rakkienggiparangna nambatgipani kri gadangrangko tikataniara manderangko uamangni dongchakenggipa gittimrangko rongtale rakkiani rantarangko ka∙angchina didiani ong∙a ine ua aganaha. Uandake manderangni gittimtangtango ranta ka∙anirang jekai jabolrangko rokomni kri ma∙eke galani, jabol galani niamrang, nokrang aro uandakgiparangko rikani jabolrangko galani cholrang, plastik jakkalaniko komiatani, sorokrangko itrokani, moila gnanggipa chirangko galani aro manderangni bakrimanirang, My City My Campaign-o bak ra∙anirang aro samtangtangko rongtal-an∙tale rakkianirango pangchake nigrikanirangko daka ine ua janapaha. Iarangko dakanichi nambate dakenggipa gittimrangna boksisrangko on∙a baksana pilak jolrangon namdapatanirangko dakna didianiko on∙a ine ua agandapaha.

Songdonggipa manderangko naljoke rakkina kamrangko ka∙engon, gong kror 6.51 tangkarangko koros ka∙e andalgipa biaprang, antidamrang, manderangni re∙chakgipa ramarang, aro skulni ramarango smart control system-rang gnanggipa ge 552 LED streetlight-rangko teke on∙gen ine ua aganaha.

Una agreba, Tura-ni dingtang dingtang biaprango CCTV-rangko done, ge 300 unit-rang aro ge 500 ong∙nasipile camera-rangko tekgen aro iarangko songdonggipa gittimrangni committee-rangna nirokna jako on∙gen ineba skotong minister aganaha.

CM Connect-ara namgipa aro manderangna cholko on∙gipa sorkariko rikna on∙kanganiko mesoka aro iani ning∙ao manderangni neng∙nikanirangko namatna aro donnua gri nirokanirangko dakna cholrangko on∙a ine skotong minister pil∙taie manderangna parakataha. Iani bidingo chimonggimin data-ko nipile nion, West Garo Hills a∙jao sak 7,644 manderang ming 767 neng∙nikanirangko janapataha, jeonikon ming 355-kode namate on∙aha aro ming 533-ko matchotatsrangaha ine ua parakataha. Garo Hills jolgimiko, sak 21,992 manderang ming 2,053 neng∙nikanirangko janapataha, aro a∙dok gimiko sak 69,975 manderang ming 5,540 neng∙nikanirangko janapataha, aro unoni ming 2,509-ko namate on∙aha aro ming 3,572-ko matchotataha ineba ua aganaha.

Uandake, songjinmarangko namroro-silroroaniona ra∙baanio chu∙sokanide manderangni salanti janggi tanganio dingtanganirangko nikani, nokdangrangni kenani gri janggi tangani, palbadinggiparangni mande ra∙a gnang janggi tangani cholko dakna man∙ani, chadamberangna dingtang dingtang cholrangko man∙ani aro songjinmako rongtal-an∙tale aro name rakkina jinmani ku∙mongrimanirangko pangchakgen ine ua aganaha.

Una agreba, songjinmao dingtanganirangko ra∙bana ja∙ku de∙anirangara 39-gipa National Games 2027-ko ong∙atna Tura-ko tarisamsoani ong∙a aro uko kal∙susaani, tourism aro janggi tangani dingtang dingtang cholrangko dake cha∙ani a∙dam ong∙atna miksonge kam ka∙ani ong∙a ineba ua talataha. Daka-rikanirangko namdapatanichi, rongtalgipa biaprangko rakkianichi, rama re∙togipa ong∙atanichi aro jatni dakbewalo tarianirangchi ia dal∙gipa tom∙bimonganio aro mikkangchini salrango a∙palchini re∙bagipa manderangna dingtangmanchagipa nika-niani ong∙gen ine ua aganaha.

Tura songjinmako rikani aro namroro-silroroatanio A∙chikrangni janggi tangani aro daka-rikani bewalrangko bijangchio donna nanga inenba, Tura-o cenotaph-ko taripilaniara manderangni gisepo gisik ra∙atani aro rasong chaaniko on∙e, jatni dakbewalko gital chasongni daka-rikani baksa meli-nangrimatani ong∙a ine ua aganaha.

Ia programme-ni mongsonggipa bak-ara CM Connect Session ong∙a, jeon songdonggipa manderang aro bimung segatsogimin bak ra∙giparang silroro-namroroani bidingo an∙tangtangni neng∙nikanirangko Skotong Minister aro official-rangni mikkango parakataha, aro uandaken sorkariko rikanio manderangni bak ra∙ani aro somoi gita manderangni neng∙nikanirangko namatna sorkarini on∙kange kam ka∙aniko mesokangaha.

Programme-ni bon∙kamgipa bako, Urban Affairs, Tura Circle-ni Superintending Engineer mitelpilani kattarangko aganenba, Skotong Minister, a∙gipi dilgiparangko, bak ra∙giparang aro pilak manderangko uamangni re∙baanina aro Tura-ko aro a∙dokko namroro-silroroatanio  bakrimanina mitelangaha.

Na·simang iakoba nina man·gen:

Na·simang iakoba poraina man·gen: Tura-ni PASF-Abong Noga College building-na pangchakaniko Skotong Minister songe on·a

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/ne_media_hub