Shillong, Sept 23: Meghalaya a•doko Congress dolko bilakbatatna gita ua pangnan an•tangko tarie dongenga ine Bristibar salo Congress Legislature Party (CLP) aro Opposition dolni dilgipa Dr Mukul Sangma parakataha.
Iani bidingo kobor ra•timgiparang baksa agangrikengon, da•o dipet ua chel•e dongna aro phone-rangko ra•chakgija dongna nangnikbatenga aro somoi sokahaon ua Delhi-o All India Congress Committee (AICC)-ni dilgiparangko gronge agangrikgen ine Sangma parakataha.
Congress dolni ning•o kam ka•ani bewalko namdapatchina ua didigen ineba Sangma parakataha.
An•tangni politics-o kam ka•ani gimin janapatengon, uni ma•a paarangba Congress dolni membor-rangan ong•achim aro ua an•tangni ma•a paarang gitan apsan dolo dongpana chol man•aha aro Ampati constituency-ni manderangba Congress candidate-kon Meghalaya Legislative Assembly-ni membor-na seokaha ine CLP-ni dilgipa parakataha.
Congress dolni gitcham dilgiparang jedake RG Lyndoh aro PN Syiem-ni dolo napaniko rimchaksoanio aro Pa Pala-ko MPCC-ni gital Padot songanina mande ra⋅aniko dakani somoio Garo Hills-ni congress dolni mongsonggipa dilgipa aro gipin congress dolni seoka man⋅giparangba dongpajahachim. Pala tom⋅ani somoio Dr Sangma kusi ong⋅jakon ine parakatanina, iani bidingo da⋅o agania kraa katta ong⋅ja maina dolni gisepo ong⋅aniko doltango agangrikchengna nanga ia Dr. Sangma aganaha.
Gital MPCC-ni padot baksa grongrikgenma ine sing⋅on, anga dolni nangchomotgipa manderang baksa iani bidingo agangrikmanaha aro iani bidingo namdapatana nanganikode angade agangkuaigen inesan Dr Sangma aganaha.
Gital MPCC-ni padot songako man⋅gipa Palani NPP baksa bakrime sorkari rikna miksongengani bidingo song⋅on, Dr Sangma agana jechake, iani bidingo agana man⋅jawa maina saksa sakgipin-ni gisik ning⋅o chanchianikode ui⋅ja indiba ong⋅enga obostarangko angni jako ra⋅e kam ka⋅aniko manderang ui⋅aigen inesan Dr Sangma aganchakaha.
MPCC-ni gital dilgipako seokani ja•man A•chik aro Khasirangni gisepo bak ong•ani dongama ine sing•on, Meghalaya a•doko songdongenggipa manderangni gisepo ma•sichakgrikani aro meli nangrimani dongna man•na gita cholrangko tarina nangenga ine Dr Sangma aganaha.
Manderangni gisepo ku•cholsan ong•aniko ra•bana man•jani gimin MBOSE-o ong•anggimin a•selko toe aganangengon, manderangni gisepo ku•cholsan ong•aniko ra•baanian politician-rangni daito ong•a ine Dr Sangma parakataha.
