Shillong, June 30: Rajasthan a•dokni Udaipur jolo dorji saksako mande sakgni gitok rageke so•otani ja•man, Rajasthan-ko Congress sorkari, ‘Taliban’ a•dok ong•atengaha ine Bharatiya Janata Party (BJP)-ni dilgiparang matnangataha.

A•songo songdongenggipa dingtang dingtang jatrangko meli-nangrime janggi tangchina didiatengon, India a•songo mikkangchi iandakgipa a•selrang ong•taijana gita dos dakgipa manderangni kosako niamo pangchake rakbatgipa sastirangko on•china BJP-ni state president Ernest Mawrie didiataha.

Ia a•sel ong•aniko Shillong Muslim Union-ni secretary aro Meghalaya sorkarini gitcham Congress Minister Sayeedullah Nongrum-ba jegalatengon, iandake misilgnigipa kamrangko Islam-oba beng•a donga ine dos dakgipa manderangni kosako rakgipa sastirangko on•china didiataha.

Re•anggipa Sombar salo, Udaipur-ni Dhanmandi police station jolo, Kanhaiyalal minggipa dorji saksako mande sakgni gitok rageke so•otgalahachim.