Certain, August 12: Assam-ni Deragaon-o donggipa mingsinggipa Lachit Barphukan Police Academy (LBPA) da·asalni bako anti 43-na gisik nange skie ra·anirangko dake matchotgimin sak-700 Goa Police-na seoka man·giminrangna Passing Out Parade-ko ga·subee ong·ataha. Ia matchotangenggipa batch-o sak 569 me·asarang aro sak 131 me·chikrang donga, jemangan be·enko ranta ka·ani, gisikko mangrakatani, kam ka·gipa biapo dakna nanggnirang, tom·tomani aro niamko rakkianiko nirokani, aro silchidarerangko jakkalani gimin bimchipe skie ra·aninrangko dakangaha.
Ia tom·anio Assam-ni skotong minister Dr. Himanta Biswa Sarma aro Goa-ni skotong minister Dr. Pramod Sawant mongsonggipa sokgiparang ong·e re·baaha. A·dok damgnini dal·dalgipa police officialrang, aro seoka man·gimin police-rangni nokni manderangba re·bae ia gisik ra·na krabegipa tom·anio bak ra·angaha.
Seokako man·gimin police-rang October 4, 2024-o Deragaon-ona dingtangmancha tik ka·gimin rel gario sokbaaha. Ia batch-o dingtangmancha Assam, Manipiur, aro Goa-oni police dolrang re·bae bak ra·aha aro a·dok damsa damgipin baksa bakrime kam ka·aniko mesokaha. Passing Out Parade-o march past, ku·mikchetani, award-rangko sualatani aro “Panthers on Wheels” unit-ni dingtangmancha dakmesokaniko dakaha, jekon a·dok damgnini dal·dalgipa police-rang nirikaha.
Goa Police dolrangna namgipa gadango skie on·anirangko dakanina Goa-ni skotong minister Assam sorkariko aro LBPA-ko mitelaha. Seokako man·gimin police dolrangni skie ra·miting somoirango ua uamang baksa agangrikrongaha aro pangnan name agananirangko knarongaha ine ua janapaha. “Chingni officer-rang gipin a·doko skie ra·e gital u·ianirangko man·e songtang-noktangona re·bapilon, chinga namen rasong chaa,” ine, ia programme-ko ra·baanichi Goa aro Assam-ni gisepo bakrimanirangko bilakatbataha ine Dr. Sawant aganaha. Ua Prime Minister Narendra Modi-ni ‘Akhanda Bharat’ ba ku·cholsan-nangrimgipa India-ko niksamsoaniko rasong on·aha aro India-ni silroro-namroroaniko 2047 bilsio chu·sokatnade, namedake skie ra·gimin police dolrangko nangchongmota ine ua aganaha.
Assam-ni skotong minister Dr. Himanta Biswa Sarma ia salko Assam a·dokna namen rasong chaani ong·a ine, LPDA-o ja 10na bate, sak 700 Goa Police-na seoka man·gimin manderangko skie on·anirangko dake chu·sokaha ine aganaha. Uandake ua Assam a·doko ka·donganina Dr. Sawant-ko mitelaha aro iandakgipa skie ra·grikanirangko dakanian a·songo nangrimaniko ra·baa ine aganaha. “Union Home Minister Amit Shah-ni oprake on·gimin ia skie ra·chakram biapara Assam a·dok aro India a·songni rasong ong·a. Chinga a·songni je bakni police dolrangna skie on·na pangnan donga,” ine ua aganaha. Una agreba, Goa aro Assam-ni meli-nangrimanichi India-ni manderangni ku·cholsan ong·ani aro tom·tom ong·aniko naljoke rakkina dakchakgen ineba Dr. Sarma agandapaha.
Assam-ni Lachit Barphukan Police Academy, India-o police-rangni skie ra·chakram biaprangoni nambatgiparangoni damsa ong·a, aro hajalni hajal officer-rang iano skie ra·ange a·songni dingtang dingtang biaprangona dangdike on·na re·angaha. Bimchipani, changa-sapaniko namdapatani aro a·dok damsa damgipin baksa bakrimanina gisik nange kam ka·anichi, LBPA a·songni niam-retirangko rakkianio nangchongmotgipa ja·kurangko de·enga.
Na·simang iakoba nina man·gen:
Na·simang iakoba poraina man·gen: Tura Football League-ni semi final-o chee Rongbrakgre SCC, final-ona doanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
