Itanagar, Oct 19: Salgro salaram jolni nanganirangko Delhi-ona sokatna man•na gita salgro salaramni pilak political dolrangkon ku•cholsan ong•e ku•rangko on•china gita The Wire-ni National Affairs Editor Sangeeta Barooah ku•pattiangaha.
Barooah-ni aganani gitade, salgro salaram a•dokrangara dingtang dingtang jatrangni songdongchakenggipa biaprangsa ong•e dingtang dingtang nanganirang donggenchimoba Delhi songjinmaode pangnan salgro salaram a•dokrangko apsan biaponin ine ma•sisretrongani gimin salgro salaramni dingtang dingtang political dolrang nangrime ku•rangko on•genchimode bilakbate ku•rangko on•na man•genchim.
‘Regional Aspiration, National Outlook’ ine pangchakaniko done National People’s Party (NPP) Arunachal unit-ni Itanagar-o tom•bimonganiko ong•atanio Sangeeta Barooah, ia kattarangko aganaha.
Dal•dalgipa aro bilakgipa dolrang pangnan salgro salaram jolrango an•tangtangni miksonganirangko drae chu•sokatna jotton ka•ronga indiba salgro salaramni political dolrang aro jolo songdongenggipa manderang uamangni, uamangni ja•gao ga•akjana gita pangnan mikrake dongna nanga ineba Barooah aganaha.
Ia tom•anio Assam Jatibadi Parisad-ni general secretary Lurin Jyoti Gogoi, salgro salaram jolrango donggipa political dolrangni gamchatgipa ong•ani gimin aganangskaengon, salgro salaram a•dokrango songdongenggipa manderangko dal•dalgipa dolrangni sinjetna jotton ka•aniko warachaksona gita joltangni political dolrang nangrime kamko ka•na nanga ine aganangaha. Salgro salaram a•dokrango Citizenship Amendment Act (CAA)-ko jegaltoksoahaoba ia niamko BJP-ni ra•gatdraahani gimin ua ia kattarangko aganaha.
CAA-ko ra•gatani somoio salgro salaram a•dokrango songdongenggipa manderang baksa bakrimpaaniko on•ahani gimin ua dingtangmancha Meghalaya a•dokni Chief Minister Conrad K Sangma-koba mittelpile aganangaha.
“Conrad Sangma an•chingni manderangna ku•rangko on•ahani gimin uan politics-ni kamko ka•gipasan ong•aija indiba kakket dilgipa ong•a,” ine Gogoi aganaha.
Assam-o niam gri napsruke songdong a•chaanirang bilongahani giminsa joltangni politics-ko a•bachengna nangaha ineba Gogoi parakataha.
