Itanagar, Oct 19: India a·songni gipin bakrangoni manderang salgro-salaramni gimin ma·sianirang komia aro pangnan uamang salgro-salaramni manderangko dingtang dake ma·ekronga ine aganenba, politicalo mangrake chadengachi a·joltangko chu·sokgipa ong·atna sikani gnang nisanko done kamko ka·na nangani gimin TIPRA-ni chairman Pa Pradyot Bikram Manikya Debbarma Mongolbar salo aganangaha.
“Regional Aspiration, National Outlook” ine pangchakaniko done Itanagar-ni DK State Conventional Hall-o Arunachal unit-ni NPP dolchi ong·atenggipa Regional Conclave-o bak ra·e aganangengon, Pa Debbarma an·tangni Congress dolo ong·engmiting somoio ong·a obostako gisik ra·ate janapjole agananga baksa, Northeast, West Bengal aro South India-ni political party-rangko regional party-rang ine chanenba salgro India-ni political party-rangkode national party-ni maming biming grioba national party-rang gita chanskana nanga ineba ua sing·doangaha.
Tripura a·doko an·tangni political dolko bikotna manchaan ua Congress doloni ong·kataha, jeon batanggimin bilsini council election-o 55 percent vote-rangkode man·paaha ine ua parakataha.
“A·songni political system-ko ra·bina gita pa·sokani an·chingo dongna gita nanga,” ineba ua aganangkuaha.
Delhi-oni a·songo sorkariko rikenggipa dolrang pangnan a·songko bak dake sason ka·ani policy-ko kal·ronga ine aganangkuenba, politicalni gita maio tik ong·bata an·ching uko chanchina gita nanga aro pangnan an·chingni manderangko mikkango donesa kam ka·na nanga ineba Pa Debbarma agandapataha.
Ia conclave-ko bakko ra·enggiparangara, salgro-salaram a·dok gimikni niksenggipa dilgiparang baksana NPP dolni National President aro Meghalaya-ni skotong minister Pa Conrad K Sangma, NPP-ni agantimgipa aro Meghalaya-ni Cabinet Minister Pa James K Sangma aroba gipinrang ong·a.
Tom·ao, Renu Loyi aro Prema Taba-maangni segipa ki·tap “Northeast: Issues, Dynamics and Emerging realities” -koba NPP-ni skotong dilgipachi oprake on·angjolaha.
