Itanagar, Oct 18: Arunachal Pradesh a•doko National People’s Party (NPP)-ko ku•cholsan ong•e mangrakbatatna gita Sombar salo dingtangmancha NPP-ni tom•aniko Itanagar songjinmao ong•atangaha aro ia tom•anio NPP-ni national president aro Meghalaya a•dokni Chief Minister Conrad K Sangma baksana NPP-ni national secretary James K Sangma aro NPP-ni gipin dal•dalgipa dilgiparangba dongpae bak ra•angaha.

Ia tom•anio NPP-ni national president Conrad K Sangma, jinmana aganprakangengon, salgro salaram a•dokrango politics-ni dilgiparang da•o dongsrangjaengaha ine an•tangni suk ong•gijaniko parakangenba, ia bangbang ong•aniko gapatchina gita NPP-ni dilgiparangko didiangaha.

“Salgro salaram a•dokrango dilgiparangni bangbang ong•aniko NPP gapatna nangenga aro an•chingni manderangni namgnina an•ching pilak biaprango songdongenggipa manderangonan sokatna nangenga,” ine Sangma aganaha.

NPP-ni mongsonggipa kaman manderangni namgnina chadengani ong•enga ineba ia tom•anio ua, NPP-ni membor-rangna talate on•angaha.

A•songni pilak biaprangon NPP-ko mangrakbate rikna nangenga ineba NPP-ni national president parakataha.

“An•ching an•chingni bebera•ani aro miksonganirangko gipate manderangni nanganirangko chu•sokate on•na krengna nangenga,” ine Sangma aganaha.Ia tom•anio NPP-ni national secretary James Sangma-ba jinmana aganprakangengon, NPP dolmangmangsan salgro salaram a•dokrangni nanganirangna kamko ka•enggipa aro manderangni ra•chakna man•enggipa joltangni national party ong•enga ine parakangaha.

NPP-ara salgro salaramna aro salgro salaram a•dokrango songdongenggipa manderangna on•kange kamko ka•gipa national party ong•a ineba ua aganaha.

Ia tom•anio Arunachal-ni NPP president Mutchu Mithi-ba jinmana aganprakengon, NPP-ni national president Conrad K Sangma-ra salgro salaram jolo saksa niksengbatgipa mande ong•e uni dilanichi salgro salaram a•dokrangko ku•cholsan dal•rorona dakchakgen ine mittele aganangaha.Gipin political dolrang baksa dakgrikjachina indiba ong•gija miksonganirangko warachakchina gitaba ua ia tom•anio NPP-ni membor-rangko didiangaha.

Arunachal Pradesh a•doko NPP-ko bilakbatatna gita krenge kamko ka•china gitaba ua ia tom•anio NPP-ni membor-rangko didiangaha.

NPP-ni tom•bimonganiko Mongolbar salo Itanagar-o ong•atenga aro ia tom•anio dingtang dingtang gadangni manderangba re•bae bakko ra•na siengachim.