Shillong, June 13: Indore-ni tourist Raja Raghuvanshi-ko Sohra-o (Cherrapunjee) ka·namgija so·otani bidingo mingsa aiao inmangipa sandianiko man·aha. Sonam Raghuvanshi aro unbaksa  matnangko man·gipa sakbri manderangko Meghalaya Police-ni sing·doe niani gitade, mande so·otani-ara pangnan uamangni chanchianio donga ine u·ina man·aha.

Sonam Raghuvanshi-ni Raja-ko bia ka·na ja-4mang skangan, Sonam-ko gimaatna chanchianirangko a·bachengaha. An·tangni gimaani aro sianiko dakjena jotton ka·anio chu·sokjae, Raja-ko so·otaona sokaha ine  Policerang aganaha.

East Khasi Hills a·jani, Superintendent of Police, Vivek Syiem-ni Bristibar salo aganani gitade, mongsonggipa chanchidilgipa Raj Kushwaha Sonam-ni gimaaniko February jaonin chanchisamsona a·bachengaha. Iarangoni mingsara Sonam-ko chibimao man·paka ine mesokna, aro minggipin-ara sakgipin mandeko so·ote Sonam-ni scooty-o done, manggisiko so·e Sonamni manggisi ine aganna ong·achim indiba iarang pilakan chu·sokjaha.

Iarangko chanchiengmitingon Sonamni Raja-ko bia ka·ani somoi sokaha, indiba uamang Raja-ko so·ote dongnue chakna manchisomanahachim.

Sing·doanirangko dakon, Sonam aro Raja-ni biana sal 11 skangan uko so·otna Raj aro Sonam chanchisoaha ine aganaha. India-ni Salgro-Salaram Madhya Pradesh-oni chel·beani gimin, uamangni songtang-noktangona koborrang ja·manchakesa sokanggen ine chanchie uamang ja·manchi Meghalaya-ona re·bana tik ka·aha.

“Raja aro Sonam bia ka·ani ja·mano Kamakhya mondir-ona bi·na re·baaha, aro uno sakgittam matnangako man·gipa manderangba re·bapaaha,” ine SP aganaha. Vishal Singh Chauhan, Akash Rajput, aro Anand Kurmi, May 19 tariko Guwahati-ona sokeaha, aro uanon Raja-ko so·otna biaprangko nisoaha.

Assam-o Raja-ko so·otna miksongani chu·sokjaon, Sonam Shillong aro Sohra-ona re·bana chanchidilskaaha. Meghalaya-o uamang Nongriat-on Raja-ko so·otna jotton ka·ahachim indiba manggisiko galna biap man·jae donpilaha. Mawlakhiat aro Wei Sawdong-ni gisepoba uamangni so·otna miksongani chu·sokjaha.

Bon·kame, May 23 tariko, Wei Sawdongni parking lot-o salni 2 aro 2:18 bajini gisepo, ua sakgittam me·asarang sakprakan Raja-ko attechi den·ataha aro Sonam uanon chadenge dongaha. Uni ja·mano uamang sakbri Raja-ni manggisiko a·silangona galonataha. June 2 tariko Raja-ni sogimin manggisiko a·silangoniko man·pilaha.

Raj-an iako mongsonggipa chanchidilgipa ong·a, aro sakgittam so·otgiparangara tangka on·e rakkigiparang ong·ja indiba Raj-ko dakchakgipa uni ripengrangan ong·a ine SP Syiem parakataha. Ramarangni korosna Raj uamangna tangka 50,000-ko on·aha aro iana agre tangka-paisa ba gam-jin on·ani ba ku·chakanirang dongama dongja policerang sandikuenga.

Raj aro Sonam-ni chanchisamsoanirang mamung obosta gri name chu·soknasiengahachim, aro Sonam sal-17 dongnue katna man·aha. Indiba iani gisepon Meghalaya Police uamangni miksonganirangko rim·a man·aha aro matnangako man·giparangko rim·na a·bachengaha. Kenjagoke, Sonam June 9 tariko Uttar Pradesh-ni (UP) Ghazipur-o mikkang pa·e an·tangko UP police-na bame on·aha.

Matnangako man·gipa sak-5ko policerang sal-8na rim·e donenga aro ia obostani bidingo sandianirangko dakenga.

Raja-ko so·otaniara Sonamni nokni manderangni songsarni gisepon bia ka·na nanga ine drae bia ka·atani a·selan ong·a ine Policerang talataha.

Bilsi 24 ong·gipa Sonam, Indore-o uni nokdangni plywoodko bading-chiwalanio accountantni kamko ka·gipa Raj Kushwaha baksa sruksruk mikchaengachim indiba uni nokni manderang iako namnikjaha. Raja baksa drae bia ka·atgenchimode, iani biteko man·gen, aro Raja-naba maiba namgija obostako ra·bagen ine Sonam noktangni manderangko ka·mikkenatahachim ineba policerang aganaha.

Sonam-ni ma·drangrangni aganani gitade, ua skia-poraia donggipa me·chik ong·achim aro ua graduationko matchote MBA dakna skachim indiba uni nokni manderang uko a·palchi kam ka·na on·jaha aro uni adatang Govind-ko bading-chiwalanio dakchakna aganaha. Sonam an·tangba dingtang dingtang kamrangko jako ra·e nokdangni bading-chiwalaniko chalaiengachim.

Na·simang ia video-koba nina man·gen:

Na·simang iakoba poraina man·gen Sonam maikai Meghalaya-oni joke Indore-ona sokanga

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Instagram- www.instagram.com/ne_media_hub