Shillong, June 13: Wei Sawdongni parking lot-o Raja Raghuvanshiko ka·namgija bewalo so·otani ja·mano, uni jikgipa aro so·otanio matnangako man·gipa Sonam Raghuvanshi changni chang bus aro rel garirangko bodole baditaba ge a·dokrangko batsote kilometre 2,227mang songree Madhya Pradeshni Indore-ona sokangaha. Iandake uni name chanchisamsoe Meghalaya-oni joke katange an·tangko rim·srukaha ine tol·e, bichal ka·aniko gelna miksonganiko pulisrang da·o parak ong·ataha.

Mongolbar salo East Khasi Hills a·jani Superintendent of Police Vivek Syiem May 23 tariko Rajako so·otani ja·mano ong·gipa obostarangko che·em che·em talate on·angaa. Salni 2 aro 1:18 bajimangni gisepo Raja-ko so·ote uni manggisiko a·silango galone, Sonam Raghvanshi aro sakgittam manderang Wei Sawdongoni scootyrango re·angaha. Re·pilna skang, matnangako man·gipa saksa Akash Rajputni an·chiraragipa ba·rako pindapna Sonam an·tangni raincoatko on·aha. Uni ja·man uamang bri Evi point-o (Mawkma jol) dongdipaha aro uno Akash raincoatko goe galataha jekon policerang ja·mano man·aha.

“Raincoatko man·pilani somoio, uano dak donggipa an·chi ma maianchim u·ijachim indiba da·ode uko an·chi ine u·ina man·aha aro chinga uko forensic-ona watatenga,” ine Syiem janapaha.

Evi Point-oni Sonamni salgipa scootyko Akash salskaaha aro uno Sonam gachapaha. Sonam aro Raja-ni para ra·gipa scootyko Anand Kurmi salaha aro uko Sohra Rim-o gale donangaha. Law Mawphlang batbae, Raj Kushwaha-ni (mongsonggipa chanchidilgipa aro Sonamni mikchagipa) on·atgipa burqa-ko Vishal Singh Chauhan-oniko ra·chake, Sonam taxi gadoaha. Burqa-ko gane, Sonam Shillongni Police Bazaar-ona re·angaha.

Shillongoni Guwahati-ona Sonam tourist taxi-ko ra·angaha. Guwahati-ni ISBT-oni (Inter State Bus Terminus) Siliguri-ona bus-o re·angaha. Siliguri-oni ua bus dingtango Patna-ona re·angaha, Patna-oni Arrah-ona re·angaha, aro uni ja·mano Lucknow-ona rel gario re·angaha. Indake ua Lucknow-oni Indore-ona bus-o re·ange May 26 tariko sokeaha. May 26-oni June 8 tarikona ua Indore-o dongnue dongaha.

Sonam-ni kate chakani ramarangko pilakkon Raj Kushwaha che·em che·em chanchie tarisoaha. Indore-o ong·engmitingo, June 8 tariko Siliguri-ona re·angchina Raj Sonam-ko ge·etaha. Uamangni miksongani gitade, Sonam-ko Siliguri-o manderangna mikkang pa·e, an·tangko rim·srukaha ine aganna ong·achim.

“Chel·begipa biapo ong·ani gimin darangba Raja-ni manggisiko man·jawa ine chanchiachim. Iani bidingo mokordoma-ko ka·na jasa-jagnirang nanggen aro unode manggisi sognok aro chinga u·ijawa ine ua an·tangko rim·sruka ine togina am·engachim” ine SP Syiem parakataha. Indiba, June 6 tariko, Sohra-ni Mawlakhiat minggipa biapni tourist guide, Albet Pde, May 23 tarik, Rajani siani salo Sonam aro raja-ko me·asa sakgittam baksa nikaha ine kobor ra·timgiparangna aganaha. Ia kobor Raj-ona sokangaha aro ua an·tangtangko parak ong·gnok ine kene, Sonam-ko Indore-oni Siliguri-ona re·ange an·tangko rim·srukaniko aganechina ge·etaha.

Indiba uamangni indake budi dakaniko Meghalaya Police u·isoe uamangko sandina Madhya Pradesh aro Uttar Pradesh-ona re·angahachim.

June 8 tariko Sonam-ni Siliguri-ona re·angna dakengmitingo, Meghalaya Pulis Akash Rajputko Uttar Pradeash-oniko rim·aha. Raj Kushwaha iani gimin kobor man·aha indiba uko policean rim·ama saoba gipinan rim·ama u·ijaha. Sonam Raj-ni tik ka·atgipa gari-o Siliguri-ona re·angengachim, unomiting Raj Kushwaha kenjagoke Sonam-na phone ka·ataha aro uko ua je biapo ong·a an·tangko parake rim·srukaoni joka ine aganchina ge·etaha.

Uandake, Sonam Raghuvanshi-ko Raja-ko so·otani sal 17 ja·mano, a·sel ong·gipa biaponi kilometre 1100-mang chel·ao donggipa Uttar Pradesh-ni Ghazipur-oniko rim·aha.

Uni kate chakna chanchisamsoanirang chu·sokjaha aro uko adita salrangna skang Shillongona rimbaaha, unbaksa aroba sakbri matnangako man·giparangko da·o policerangni ning·o sal-8na donenga. Uamang sakbongako – Sonam Raghuvanshi, Raj Kushwaha, Vishal Singh Chauhan, Akash Rajput aro Anang Kurmi-ko sing·doanirangko dakenga.

Na·simang ia video-koba nina man·gen:

Na·simang iakoba poraina man·gen: Rengigreni Pirot R. Marakko so·otasa ine potchipe manggisiko bilpila

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Instagram- www.instagram.com/ne_media_hub