Tura, Dec 12: Tura jillani damchet gittimrango donggipa sorkari a•arango ru•utbea bilsirangna maming ka•dongani gri ong•e aro neng•nikanirang baksa songdong a•chabaenggipa te 754 nokdangrangna Sukrobar salo, a•a parani lekkarangko sualataha aro ia lekkarangko man•e, ia gittimrango songdongenggipa manderang da•o ka•dongataniko man•aha.
Ia a•ani lekkarangko a•dokni Chief Minister Conrad K Sangma, Cabinet Minister Marcuise N Marak-ni dongpaanio, ia nokdangrangna pakwate on•ataha.
Ia gittimrango donggipa nokdangrangna a•arangko para dake on•na lekkarangko sualatanio a•dokni Chief Minister, jinmana aganprakangengon, “Tura-o ia gittimrangona an•chingni dilgipa PA Sangma re•anga changantian, ia gittimrango songdongenggipa manderang, an•tangtangni sorkari a•ao songdongengani gimin suk ong•jae, an•tangtangni neng•nikanirangko namatchina uko gronge didirongachim. Ia gittimrangoni bang•batan ramarangba dongja, bijoliba dongja aro chirangko sale on•aba dongja. Ia manderang, nangchongmotgipa lekkarangko tarianioba bang•en neng•nikanirangko chagrongna nangronga. Baditaba bilsirangni ja•man anga Tura-o election-na susaon, ia apsan gittimni manderang, angona re•bae, an•tangtangni neng•nikanirangko janapetaiaha. Uni giminsa anga ia neng•nikaniko namatna jako ra•e kamko ka•aha aro dingtang dingtang neng•nikanirang donggenchimoba rakbee kamko ka•anichi chinga ia manderangna cholko sandie man•aha,” ine Chief Minister aganaha.
Ia a•ani lekkarangko pakwate on•na gita tom•aniko ong•atanio, bigha 452 a•arangko, sorkarini a•ao songdongenggipa manderangna para dake on•skana gita a•a parani lekkarangko sualataha.
PA Sangma sagini ia manderangna kam ka•aniko gisik ra•atpilengon, Chief Minister-ni mikronrango mikchirangba tingtotaha.
“Ia manderangni neng•nikanirangko PA Sangma namatna gita rakbee kamko ka•aha. ‘Ia sorkarini a•ao songdongenggipa manderangara sawarang? Uamangba an•chingni manderangan ong•a aro an•chingan uamangna dakchakna nanggen’ ine PA Sangma aganrongachim,” ine Conrad aganenba, uni mikrononi mikchirang tingtotbae, uni agananiko ua dikdiksa dontongaha.
Chief Minister-ni aganani gitade, manderangna dangdike on•na gita Isol una cholko on•enga ong•ode, manderangni neng•nikanirangko namatna gitasa pangnan krengchina uni pagipa Purno Sangma sagi aganrongachim.
Ia biaprango songdongenggipa manderangna sorkari, politics-ni gita ia a•a parani lekkarangko sualenga ong•ja ine talataniko on•angengon, ia kamko sorkari election-na skangba dakna man•aiachim indiba uamangni miksonganian neng•nikanirangko man•enggipa manderangna dakchakanirangko on•anisa ong•engani gimin ia salni bako ia lekkarangko sualataha ine Chief Minister aganaha.
Ia a•ani lekkarangko ra•chakenba, somoi gita gamna nanganirangko gamchina gitaba Chief Minister, ia gittimrango songdongenggipa manderangko didiangaha.
Sorkari darangkoba a•rikgalna iako dakenga ong•ja aro ia sorkari ong•enga dipetde darangkoba a•rikgaljawa indiba mikkangchi gipin sorkarirang re•bana nangode ia biaprango songdongenggipa manderangna mai ong•gen ineba Sangma, an•tangni jajrengchakenganiko parakataha.
Ia a•ani lekkarangko gital dake taripilnaba man•aia aro parani damkoba manderang gamsokna gita komien tariaha ineba Chief Minister talataniko on•angaha.
West Garo Hills a•jani Tura jillao donggipa sorkari a•arangko 2023-2024 bilsionin songgigrikna a•bachengataha aro uandaken 2025 bilsini November 26 tariko Cabinet tom•aniko ong•atangenba, Tura jillani ning•o donggipa damchet gittimni bigha 452 a•arangko, te 754 nokdangrangna para dake on•skana tik ka•angaha.
Ia damchet gittimrangara, Dakopgre Ronggi Songgital, ITI Upper Matchakolgre, Meghalaya Survey School gittim, Sepoy Colony DC office gittim, Deringgagre gittim, Chinap Aslang gittim aro Nikwatgre gittimrang ong•a.
Na·simang iakoba nina man·gen:
Na·simang iakoba poraina man·gen: MePDCL,One-time Settement Scheme-ko Distribution Franchisee jolrangna ra·doa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
