Shillong, Jylliew 05: Ka Jylla Meghalaya ka la mad lypa ia ki jingktah jong ka jingkylla ka suinbneng, kynthup ia ka jingkiew ka jingshit, ka jingkylla ka rukom ioh slap bad ka jingjur ka jingduna um, ong u Chairman ka Meghalaya Legislative Assembly’s Committee on Environment Rakkam A Sangma haka jingrakhe ia ka World Environment Day.
Haba kren hadien ka prokram thung dieng ha Meghalaya Legislative Assembly ha Shillong, u Rakkam u la ong ba ka jingpynneh pynsah ia ka mariang ka dei ban long ka jingkitkhlieh lang namar ba ki jingeh kiba iadei bad ka jinglong ka suinbneng ki dang iai bteng ban ktah ia ka Jylla.
“Ka jingkylla ka suinbneng kala nang ktah ia ka Meghalaya, da ka jingkiew ka jingshit, ka jingkylla ka rukom slap, ka jingduna um bad ka jingduna slap bad kine ki kylla long ki jingeh kiba nang jur” u la ong da kaba kyntu ia ki nongshong shnong bad ki paidbah ban iashim bynta shitrhem ha ki jingpyrshang ban pynneh pynsah bad pynroi ia ki khlaw ki btap.
Kane ka jingkren ka la mih ha ka jingrakhe ia ka sngi pynneh pynsah ia ka mariang lane World Environment Day, ba pynlong da ka Committee on Environment, ha kaba ki MLA bad ki Ophisar ki la thung kumba 30 tylli ki dieng hapoh ka jaka jong ka Assembly kum shi bynta ban kyntiew ia ka jingsngewthuh ia ka mei mariang bad ka roi ka par kaba neh.
U Rakkam u la ong ba ka Committee on Environment kan dang iai bteng ban rah ia ki mat kiba iadei bad ka jingiada ia ka mariang bad ka jingpynroi ia ka mariang bad kan trei ban pynsngewthuh kham bha ia ki paidbah halor ki jingeh ha ka jingsumar mariang kiba ka Jylla ka kynduh.
U Secretary ka Meghalaya Legislative Assembly, u Malthus S Sangma u la ong ba ki jingthmu ban ïada ïa ka mariang ki dei ban ïaid shabar na ki jing thung dieng bad pynleit jingmut ha kaba pynthikna ïa ka jingim bad jingroi jong ki dieng ba la thung.
“Ka jingthung ia u dieng ka dei tang ka jingsdang; ka jingkitkhlieh jong ngi ka long ban pynthikna ba un im bad un roi,” u la ong.
Ha kane ka prokram la wan ïashim bynta da ki dkhot ka Committee u Bah Ollan Singh Suin, u Arbinstone B. Marak bad u Bah Nujorki Sungoh, ryngkat ki ophisar jong ka Assembly Secretariat bad ka tnat Social Forestry.
